Bukon Man It Bulag si Juan

Bukon Man It Bulag si Juan
Ni Melcichon Oct. 3, 2012

Bukon man it bulag si Juan
Bukon man imaw it apa
Bukon man imaw it bungoe
Ugaling ginbusaean
Ginbuta-butahan
Ginbutangan it tabon ra dueongan.
Ahay, masueat eon lang kuno imaw
It binaeaybay hanungod
Sa adlaw nga ginatabutan it gaeum
Hanungod sa suba nga daeag ro gasueog nga tubi
Hanungod sa eawod nga may gaeutaw-eutaw nga balyena.
Masueat eon lang kuno imaw
Hanungod sa mga bukaw, sa mga uwak
Ag sa mga rosas nga ginakutoe sambang sukoe pa eang.
Indi gid kuno pwede magsueat
Hanungod sa mga nakakatunaw nga pundo it gobyerno.
Ahay...
Magpanihoe eon lang si Juan
Agod magbaskug ro huyop it hangin
Agod ra bulador hay magtaas ra eupad.
Ugaling ginputoe man ra ikog.