Total Pageviews

Search This Blog

Tuesday, July 31, 2018

Ro Lobo ag Ro Unga

Ro Lobo ag Ro Unga
Ni Aesop
Gin-Inakeanon ni Melchor F. Cichon
July 20, 2017


Nagatungtong ro sangka unga sa ibabaw it bubongan it baeay, ag hakita nana ro nagaagi nga Lobo*.
Ag eagi-eagi nga ginwakaean nana ra kontra.
“Manugpatay ag manakaw,” anang singgit. “Ano ro ginaobra mo riya sa mga pamaeay it mga tawo nga matarong? Nagpakita-kita ka pa riya kon siin ring mga maeain nga hinimuan hay bantog?”
“Paeayo, salbahi nga amigo nga unga,” sabat ku Lobo.
*wolf

Ro Ungang Bakero it Mga Karnero

Ro Ungang Bakero it Mga Karnero
Ni Aesop
Gin-Inakeanon ni Melchor F. Cichon
July 30, 2018


May sangka bakero it mga karnero sa binit it sangka bukid.
Agod magsadya ra pamatyag, may ana nga napiniinuhan.
Dumaeagan imaw maeapit sa mga pamaeay sa sangka barangay ag nagsinggit it “Lobo! Lobo!”
Naggueowa ro mga tawo ag nagpaeapit kana. Ro iba hay nag-iba pa kana.
Naghiyom-hiyom imaw sa ana nga gin-obra, busa pagkataliwan it pilang adlaw hay ginsamitan eon man nana ra pagsinggit it “Lobo! Lobo!” Sa uman, dagaya nga mga tawo ro nagdaeagan paeapit kana agod mabuligan imaw.
Pero pagtaliwan it pilang oras hay may lobo gid man nga nagpaeapit kana. Kinoebaan ro mga karnero ag nagtaeang-taeang sanda kon siin sanda maagto. Siyempre ro ungang bakero hay hinadlukan man. Suminggit imaw it mas mabaskog nga “Lobo! Lobo!”
Pero ro mga tawo sa barangay nga nakaagi eon it pagluko ku bakerong unga hay owa gid it may nagpaeapit kana.
Busa nagpaayaw-ayaw gid ro lobo sa karne it mga karnero nga ginabantayan it unga. Pagreklamo ku unga kon ham-at ginpabay-an imaw it mga tawo sa barangay hay ginhambaean imaw it sangka magueang nga: “Ro tawo nga purilon maski kasugid eon it matuod hay owa ginapatihi.”

Tuesday, July 24, 2018

May Fashion Show Kaina sa Kongreso

May Fashion Show Kaina sa Kongreso
Ni Melchor F. Cichon
July 23, 2018

May fashion show kaina
Sa Kongreso.
Owa mo makita ay?
Sari-sari nga pesti ay besti gali ro ginpangsuksok
Ku atong mga honorable nga mga kongresista
Ag mga senador.
Ahay, kunta sari-sari man ro anda nga ginpangduso
Nga mga layi agod itib-ong ro atong banwa
Paeayo sa kaimueon.
Kunta sari-sari man ro andang
Gin-obra nga mga layi
Agod maduea ro mga tawong grasa sa karsada,
Agod indi maanod it baha ro atong pumueoyo.
Ahay, raya gid baea ro andang ginpangpromisa
Sa mga Filipino tag nagakampanya pa eang sanda?
Raya gid baea ro atong ginhandum
Sa mga depotado natong manughimo it layi?
Kunta nag-ilentra eon lang sanda sa mga beauty contests.
Mapaeakpak gid ako kanda
Samtang kiay-kiay sanda sa emtablado.

Monday, July 16, 2018

Haiku, prison

prison--
a jailed father sucks milk
from his daughter's breast
***Melchor F. Cichon.
July 16, 2018

Sunday, July 08, 2018

Flash Fiction, Rhum


Rhum
Nag-agto si Senador Juan sa Switzerland.  Tag nagaihapon imaw sa sangka 5-star hotel, nag-order imaw it rhum sa waiter.
“Ro pinakamahae gid ha!”
“Huo, Sir!”
Pagbalik ku waiter, ginduhoe kana ro sangka bote nga Tanduay Rhum. Nagreklamo si Senador Juan.
“Ham-at raya?”
 “Sir, raya ro pinakamahae namon nga rhum!"

haiga--misa

Misa--
gulpi nga nagdaeagan ro unga
sa gasermon nga pari
**Melchor F. Cichon
July 8, 2018

Tigtaeanom

tigtaeanom--
gahinguto ro taeabong
sa likod it anwang
***Melchor F. Cichon.
July 8, 2018

Thursday, July 05, 2018

Mabatian Ko Ro mga Kanta ag mga Panghayhay It Mga Akeanon

Mabatian Ko Ro mga Kanta ag mga Panghayhay It Mga Akeanon
Melchor F. Cichon
July 5, 2018

Mabatian ko ro mga kanta ag mga panghayhay it mga Akeanon.
Ro mga lullaby it mga nanay nga nagapatueog sa anda nga mga unga samtang owa pa kauli ro andang mga asawa nga igto pa gaung-ong it tanduay sa binit-karsada.
Ro mga lullaby it mga bakero nga aga-aga pa gahalin sa andang baeay agod mapahangeab ro andang mga anwang.
Ro mga mangunguma nga nagaarado sa mga eanas nga andang ginaagsahan.
Ro mga panamgo it mga unga nga gahinueat sa andang mga OFW nga nanay samtang ro andang mga tatay hay gahikap-hikap sa andang mga kabit.
Ro mga panghayhay ku mga pasahero kon mag-agto sanda sa Malinao halin sa Kalibo bangod sa indi matapos-tapos nga pagkumpuni it karsada.
Ro mga boses it mga Ati sa Kalibo kon sanda magpangyo-ngayo ag kon ginatabog sanda paeayo sa mga malls.
Pero mabatian ko man ro mga paghinahaeakhak ku mga honorable nga mga politiko samtang gahuyap sanda ku andang mga tinipon nga mga pilak samtang gaeagueok ro mga tiyan it mga pumueoyo.