Indi Sabat Ro Droga

Indi Sabat Ro Droga

 ni Melchor F. Cichon
Sept 12, 2016

May hakita eon man

Nga eaeaki

Sa kahilamunan,

Sa binit it karsada.

Nagakaya.

Puno’t dugo ra dahi.

Patay.

Naputos it tape

Ra bibig.

Sa likod na,

Nakabaklid ra daywang alima.

May kalibre .45

Sa dughan na.

May cardboard nga nakakabit

Sa liog na

Nga may nakasueat:

“Ako hay Drug Pusher,

Ag dapat eang nga maduea!”

Sample eang ra

Sa sobrang daywang libong drug pusher

Ag drug addict nga natudas

Paglingkod ni Duterte.

Owa’t eabot ro  65,000

Nga surrendees bangud sa droga.

Mga kasimanwa,

Manindugan kita!

Sa atong mga alima nakasandig

Ro pag-uswag ta,

Ku atong pamilya,

Ku atong banwa!

Apang ham-at  owa naton

Ginapanumdom ra?

Ham-at  nilibo ro drug addict,
Ro drug pusher sa atong banwa?

Tanan kita may problema.

Ag kada problema

May solusyon ra.

Buko’t solusyon

Ro droga

Sa pagbueong it problema.

Kon may kalipayan sa paggamit it droga,

Kalipayan eang ron it nagaobra kara.

Samtang gabinug-at ro andang buesa,

Gaeutaw-eutaw ro piniino’t drogista

Kon paano makakita’t kwarta

Agod ibakae it droga.

Tanan kita may kaaeam,

May abilidad agod kita mag-uswag.

Indi kinahangean

Ro pagsuyop it rugby

O pagyupyop it marijuana

O pag-inum it heroin  o ecstasy.

Indi kapanas ra ku atong problema.

Magtanum kita it kahoy

O daehog sa palibot ta,
May anihon pa kita.

Ibubo ro mga kalisod

Sa mga tinaga ku atong binaeaybay

O matag-ud nga mga estorya.

Pwede man idrible ro mga problema

Sa basketball court sa plasa.

Mga kasimanwa,

Magbueoytan kita

Sa pagpauswag ku atong pamilya,

Ku atong banwa!