Galitik Eon Rang Eanas*
Melchor F. Cichon
May 30, 1994
Galitik eon rang eanas.
Owa eon man gapaeapit
Ro mga taeabong
Sa ang eangbon--
Inubos eon sanda't baril ni Juan ag ni Uncle Sam.
Mga onga eon lang
Nanday Tay Omeng ag ni Nong Ulding
Ro gaestorya kakon
Kon kapoy eon sanda
Sa andang pagpaeupad it bulador.
Maski rang apo nga ginbutiti ko
Hasta makatapos sa kolehiyo
Hay owa eon man ngani nakapadaea kakon
It maski putos it sigarilyo.
Ro mais nga gintanum ko
Hay owa eon man mapusli
Ay tag-aeanyon eon ra bunga
Hay ginpanungan man it mga maputing buhok nga eanggam.
Gusto ko man kunta magtanum it paeay
Ugaling owa ako't inugbakae
It krudo ag inugsuhoe sa manug-arado.
Ag ro insektisaid man
Nga owa't eabot nga gapang-uk-ok it kuko
Hay ginpang-ubos man nana ro kuhoe ag ro mga puyo ag pantat
Sa kaeanasan ag sa kasubaan.
Peru indi bale
Mangayo eon lang ako't bulig
Sa teknisyan it gobyerno
Kon ano ro mayad sa problema ko.
Ugaling basi pangayuan man nana ako't eana
Agod makadaeagan ro anang trisikad
Ag owa eon ako't kueouton
Nga ninoy sa akong buesa.
***
*I accidentally discovered this poem in one of my old notebooks. This is dated May 30, 1994.
Kon tan-awon ko si Ambeth nga naga-arado
Ginapanumdom ko ra Nanay sa katre
Nga gahueat it grasya sa eangit.
Gatueok sa bubungan
Kon siin makita ro pilambato nga bituon
Sa magae-umon nga kaeangitan.
Apang ra uyahon ka anang Nanay
Hay masiga paris it daho't saging
Kon silakan sa agahon.
***
This is my other old poem which I discovered in my old notebook.
No comments:
Post a Comment