Mga Bag-o Nga Luwa Ni Tay Itsong
***On-going ra
updated: April 26, 2023
updated May 12, 2024
Pag-agto ko sa Limasawa,
May naghutik kakon nga daeaga
Ro nahauna kuno nga mesa sa Pilipinas
Igto ginhimo sa Butuan, bukon sa Limasawa.
***Melchor F. Cichon.
May 24, 2024
Pag-agto ko sa Antique
Nakakita ako't tiki.
Umihi
Sa tangkugo ni Nene.
***Melchor F. Cichon.
May 21, 2024
Sa kaeanasan may paraiso
Pagkatapos mo’t pag-arado’t pagtanum
Pwede ka eon dayon magtangway it tuba
Ag magharana sa imong eangitnong nobya.
***Melchor F. Cichon.
May 17, 2024
Sa klase ni Ma'am Maria,
Mahipos tanan ro mga eskuyla.
Gali kada isaea kanda
Very busy sa cellphone nanda.
***Melchor F. Cichon
May 17, 2024
Sa eangbon ni Juan Posong.
May nagsaka nga ermitanyo.
Obrahan kunta nana it berso,
Ugaling nagkupos ra ueo.
***Melchor F. Cichon
May 17, 2024
Sa Akean may nahueog nga eanggam
Gin-eangoy ni Lolo Juan agod ana nga buligan
Ugaling gin-ingaan imaw it kuring
Ay ana kuno nga payukan ag iisumsuman.
***Melchor F. Cichon.
May 17, 2024
Sa ibabaw it kamalig,
May sueat nga nagasab-it.
Ginbasa it kuyapnit
Owa kuno kana't gapaeapit.
***May 12, 2024
Kon mag-agto ako sa bueangan,
Madaea ako't pasayan
Agod kon makakita ako't ayam
Dayon ko imaw taw-an.
***May 12, 2024
Sa among eanas
May nagtugpa nga ilahas,
Pagsabod ko kana't bugas
Ana ako nga gin-eagas.
***May 12, 2024
Ginhaboy ko ro bakod
Sa gawaeas nga eawod.
Pagkakita kang igkampod,
Ana ako nga gintig-eod.
***May 12, 2024
Sa amon nga aquarium
Gapaligos ro maya kon gasikaeum.
Pagkakita ku kuring namon.
Ana nga gin-eumpatan dayon.
***May 12, 2024
Sa opisina ni Juan Posong,
Nagbisita si Lolo Itsong.
Ay abaw si Juan Posong
Very busy gid sa pagmarites kay Inday Asong.
***May12, 2024
Nag-agto ako sa Ubos
Agod magpueo' wet ligbos.
Rang pagpueot owa pa matapos,
May nahueog nga ibos.
***April 30, 2023
Igto sa among eanas
May manok nga ilahas
Ginsaburan ko't baeas
Pati rang tudlo anang gin-eagas.
***April 30, 2023
Indi pa baea husto
Rang pagmahae kimo?
Ham-at gin-aywan mo ‘ko?
May ginbaton kang bag-o?
***April 26, 2023
Pagsueod ko sa library,
May libro kakon nga nag-atubang.
Ano kuno rang obrahon kana?
Hambae ko punasan kita ay makatoe ka eon kon buytan.
***April 25, 2023
Samtang gapanaw-panaw ako
Sa among poblasyon,
Nasandaran ko ro sangka talibong.
Abaw nagtindog ra ag naghambae kakon: "Stay in attention!"
***April 25, 2023
Igto sa amon
May tikong baboy.
Ginsueod imaw sa tikong tangkae.
Ro gabahug kana hay tikong tomboy.
***April 25, 2023
May hakilaea ako nga daeaga.
Marites ro tawag kana.
Daywang kurso ra natapos:
Master in Maritesology ag Master in Marisolsology.
***April 25, 2023
Nag-agto ako sa suba
Agod magdakop it mga paka
Agod isumsuman ni Tatay
Sa tuba nga anang tinangway.
***April 25, 2023
May hasob-eang ako nga daeaga
Abaw a, gapahueoy-hueoy gid ka mata
Ugaling nasandad sa gausli nga bato.
Ahay, nagbukoe ra ueo.
***April 24, 2023
Nagpaligos ako sa banyo,
May hakita akong bao;
Gintao ko kay Lolo,
Gintungtong na sa ueo ko.
***April 24, 2023
Nag-agto ako sa opis.
Nagkaon ako't ibis.
Nag-abot si huwis,
Nagkanta imaw it lawiswis.
***April 24, 2023
Abril paeang Paskwa eon sa Kalibo.
Ro suga abi igto hay "patay-sindi" kuno.
***April 24, 2023
Kon ugsad, gamahae ro pasayan ag isda,
Pero gabarato kuno ro atay.
Ham-an baea?
Abu abi kunong silhig nga makitang gaeupad kon ugsad.
***April 24, 2023
Nonoy, bangod gusto mo gid akong ibhan sa pag-uli ko
Agod makilaea ka ni Tatay.
Pero kon madalin-as ka sa among hagdan,
Ipaangkap gid kita sa among German Shepherd.
***April 23, 2023
Nonoy, magtueok ka sa waea,
Pero kon magtueok ka sa tuo,
Siguraduhon mo nga ona ako
Agod kon maghiyumhiyum ka kakon, mahiyumhiyum man ako kimo.
***April 23, 2023
Ro gumamela maski mag-eaya,
Ra kahumot mapabilin pa gihapon,
Paris sa pagmahal ko kimo.
Buko't parehas sa pasalig mo nga naeunot pareho't eanot.
***April 23, 2023
Nonoy, abo gid nga saeamat
Sa libre mong pagpasakay kakon sa imong trisikol.
Inday, hasta sa eangit man rang pagpasaeamat kimo
Sa pagpasakay mo kakon hasta sa bituon.
***April 23, 2023.
Nonoy, hasayran ko nga outstanding ka
Imaw ron nga igto ka pirme sa guwa’t opisina
Gabantay it nagaaeaging mga daeaga
Samtang nagahueagog eon ring ueobrahon sa opisina.
***April 23, 2023
Tag buhi pa si Tatay ag si Nanay,
Owa gid ako kakita kandang nagaaway.
Kon gabukae ra dugo ni Tatay,
Ginapainum imaw it tubi nga halin sa banga ni Nanay.
***April 23, 2023
One, two bato.
Three, four bapor.
I love you before
Until the moon and the sun have lost their flavor.
***April 23, 2023
Matuod nga owa’t tugas ro kapaya
Pero kon masamitan mo ra euto nga bunga
Indi ka gid magnuoe; permi mo gid nga handumon
Ra mapuea-puea nga unod paris sa ginahandum mong huo kakon.
***April 22, 2023
Kaeain gid kuno nga olitawo
Nga kon nabalibaran eon ngani ku ginakailaan na
Sige man gihapon ra pagsinag-ob it tubi
Ag pagbinus-ak it kahoy sa baeay it daeaga.
***April 22, 2023
Sa idaeum it lamesa,
Ro mga guyom gamesa.
Indi kakita si Lolo Itsong
Ay ra mata madueom.
***April 22, 2023
Kon hiagto ka sa banwa't Lezo
Pareho eang nga owa ka kabisita igto
Kon owa ka't pasalubong nga buti ag kueon
Nga produkto it banwa namon.
***April 22, 2023
Saea, daywa, tatlo
Hakwaton eon naton ro baeay ni Lolo Itsong
Ag isaylo sa may puno it butong
Agod indi eon ra paghapayo’t kapreng perming hilong.
***April 22, 2023
Kon ikaw papilion
Anong kolor it rosas ring pueoton?
Puea, puti, berde, asul o itum?
O basi gusto mo ro dueaw nga nagatao’t kahamungayaan?
***April 22, 2023
Sa mga rosas nga hakita mo,
Sin-o gid ring hapilian?
Kon parte kakon nga ginsikway mo,
May nagahulid eon kakon sa among duyan.
***April 22, 2023
May sambulig ako nga sab-a
Nga ginregalo ko kay Maria.
Ginkinaon na hasta mag-aga-aga.
Ahay, sa ospital imaw dayon ginpurga.
***April 22, 2023
Sa ibabao it niyog
May tumogpang banog
Agod mag-inum it tuba sa saeod.
Ahay nahilong, nahueog.
***April 22, 2023
Igto sa Lezo,
Kun alas tres it Viernes Santo,
Ro mga unga gatumbo-tumbo
Agod magtaas kuno.
***April 22, 2023
Sa atop it among kamalig
May magkae nga galigid-ligid.
Kon owa ko madiparahi sa maeukong ko gid
Nga may tinueang manok tumogpa.
***April 22, 2023
Pag-agto ko sa Boracay
May nasub-eang ako nga daeagang Bukay.
Nagpangayo ako kana it tinapay,
Gintaw-an nana ako't mainit-init nga monay.
***April 21, 2023
May ginbitay ako nga monay
Sa kilid ku among baeay;
Pag-agi ni Lola Bilay,
Ginkuhit na ku anang eaway.
***April 21, 2023
May sangka eake nga haras-haras
Nga nag-eugad sa among baeas;
Mayad eang ay ro mga nag-aeagi
Hay mga meron nga may ikog it pagi.
***April 21, 2023
Ro mga bituon sa eangit,
May nagakilo-kilo, may nagakurapkurap;
Pareho man sa eugta
May nagadayaw, may nagaeaguta.
***April 21, 2023
Ro mga mata mo Inday hay daw ugsad nga buean.
Kun magtueok, may daea nga duyan;
Matueok sa waea, matueok sa tuo,
May pagtueok nga ginaduyog ako.
***April 21, 2023
Kon ako mangasawa
Pilion ko ro taga-Ibajay.
Bangod owa sanda kapanghayhay,
Pirming malipay ro sueod it panimaeay.
***April 21, 2023
Kon ro jeepney driver hay a sweet lover
Ag ro pulis hay a never ending lover
Ag ro seaman hay your forever man,
Ano ro tawag sa piloto, a forever transferee man?
***April 21, 2023
Sa payag-payag ni Juan Posong
May nagsaka nga ermetanyo.
Obrahan kunta nana ni berso
Ugaling nagkupos kuno ra ueo.
Kon madumduman ko ro banwang Banga,
Madumduman ko man ro nagbastid kakon nga maambong nga daeaga.
Ay gali rang mga sueat kana ginabuesa ku naga-obra
Sa post office ku andang banwa.
***April 21, 2023
Indi eon pagpatueoa ring euha
Kon nagsab-it imaw sa ibang daeaga;
Maghibayag ka eon lang ay ra anang sinayluhan
Hay nasab-it sa banabana.
***April 21, 2023
Pagkatapos it pamahaw,
Naligos si Juan Posong sa linaw.
Pagkataliwan it sangka-oras nagpanaw
Kaibahan si Kumpare Islaw
Sa simbahan agod magpalibanaw
Sa mga kasaeanan nana nga dueaw.
***Melchor F. Cichon.
May 20, 2024
Pagkatapos it pamahaw,
Naligos si Juan Posong sa linaw.
Pagkataliwan it sangka-oras nagpanaw
Kaibahan si Kumpare Islaw
Sa simbahan agod magpalibanaw
Sa mga kasaeanan nana nga dueaw.
***Melchor F. Cichon.
May 20, 2024
