Kon May Tinanum Ka, May Anihon Ka?

Ni Tay Itsong
July 8, 2012

Masyado ka alwan si Nanay Ana sa anang mga gumangkon.

Sunod-sunod nana nga ginpatuon sanda. Ag tanan sanda hay nakatapos sa andang pagtuon. Si Tomasa hay naging maestra. Si Juan hay naging accountant. Si Marie hay naging nars. Ag si Johnny hay nakatapos it computer science.

Nag-eaom si Nanay Ana nga kon magmasakit imaw hay may mabulig kana sa pagbakae it mga kinahangeanon nana nga bueong.

Pero sambilog gid lang ro nagbulig kana. Si Tomasa.

Pagmayad na hay hadumduman nana ro ginhambae kana ni Lola Juana nga “Indi ka magsalig nga kon may tinanum ka, may anihon ka.”