Daeha Ako Sa Maeara

Daeha Ako Sa Maeara
ni
Melcichon
August 11,2013

Daeha ako sa Maeara
Kon siin ginbuksan rang piniino
Ku mga pagpuka ku mga puyo ag gurami
Ag mga kuoe ag ige nga eumuton
Ag mga tambibidli nga nagahapon sa amon nga tigawnan.
Igto kon Dominggo it hapon
Kami ni Tatay ag iba pa nga mga Tatay gapamunit
Agod may amon nga payukan
Ag isuea sa ihapon
Ag isumsuman sa tuba--
Aba, panghueasan ka gid it higup it sabaw
Kapin pa gid kon mahaeang-haeang.
Gahaba dayon ro gabii
Sa pagkinanta it Dandansoy.
Ag kon amat
Matueogan ako
Sa owa't katapusan nga hinala
Ni Tatay ag ku anang kainum it tuba.
Ugaling sa paglinigidligid it inadlaw
Ro Maeara nahimo nga taeamnan it paeay
Ag indi eon pwede magpamunit ro mga Tatay
Ag ro tuba hay inislan eon man it Tanduay,
Red Horse ag Fundador.
Ag ro sumsuman
Ay bukon eon it puyo o pantat
Kundi binakoe eon nga manok
Bangod inubos man ro mga isda sa kaeanasan
It indren.
Pero daeha man ako gihapon sa Maeara.
Igto ko tan-awon ro pagtunod it adlaw
Sa puno it paeay.