Limog it Sangka Ati

Limog it Sangka Ati

Ni Melchor F. Cichon

Maeapad nga kaeanasan rang hasayran.

Owa’t eabot ro mga kabukiran

Kon siin ako libre gapangayam.

Nakapaligos man ako sa Akean

Bag-o pa man kaabot ro mga putian.

Nagapailig ako it botong halin sa bukid

Hasta sa Kalibo kon siin rang gamut ginabaylo

Sa asin, sa ibis, sa dayok nga madaea ko

Sa amon nga maeamig nga baryo.

Pero pag-abot it mga putian,

Rang kalibutan hay gin-islan:

Bukon eon kuno ako ro dag-ana

It mga kaeanasan ag mga kabukiran.

Indi eon kuno ako makakaingin,

Indi man kuno ako makapangaeam

Kon siin rang mga kagueangan natawo

Ag kon siin man ako natawo.

Kon tueokon mo ako maskin ano kataeum,

Indi magbaylo rang kueong nga buhok

O rang itom nga panit.

Paris kimo, kon indi mo ako pagbatunon nga tawo

Indi man ako mabaylo.

Rang kanta maskin ano ka baskog

O maski ano kanami

Indi mo man gihapon pagpamatian

Ay imo man lang nga ginabungoe-bungoean.

May aton man kuno nga gobyerno

Agod ro tanan hay taw-an it katarungan;

Pero ham-at kon kami gusto magsueod sa mga istablisimento

Indi pa ngani kami kaabot sa gate ginatabog eon kami it mga guard.

May aton man kuno nga mga laye

Agod ro tanan hay may kaginhawahan;

Pero ham-at ro iba may bugas, may suea

Samtang kami katueok eang?