PAGHIPOS KON OWA KA IT MAHAMBAE NGA MAYAD SA ISIGKATAWO

 

PAGHIPOS KON OWA KA IT MAHAMBAE NGA MAYAD SA ISIGKATAWO

Masame naton mabatian nga ginalibak ro sangka tawo it ibang mga tawo. Ano gid baea ro rason nanda kara? Ano may plano sanda nga gob-on ra personalidad ku andang  kakilaea? Raya hay masame nga nagakatabo sa sangka grupo, sa opisina, o maskin sa sueod it pamaeay.  

Raya kon amat ro nagakaeatabo sa opisina. May sangka katrabahador gid ron nga nainggit sa pwesto nga indi nana malingkuran bangod kueang imaw sa ekspirensya o sa tinun-an,  Busa magsinugid ron imaw ku anang hasayran sa sangka tawo agod makabuoe imaw it simpatiya ag kon abo eon ro mga katrabaho nana nga mag-eain ro andang buot sa tawo nga ginabutong na papanaog, eaban mahuy-an ro tawo ngaron ag kon indi eon imaw kaagwanta sa mapiot nga sitwasyon sa andang opisina mahalin eon lang ron imaw sa ibang departaminto o maresign eon lang ron imaw. Ag siyempre, malipay gid ro tsismosa. Pero may iba nga tawo nga imbes maghipos sa nagakalat nga estorya, masukoe imaw. Laban nga kumprontahon nana ro tawo nga nagapakanubo o nagapakahuya kana. Ag raya eon dayon ro umpisa it away sa barkada o sa opisina. May ibang tawo nga embes nga magkompronta sa tsismosa, mabaeos man imaw ron. Tun-an ron nana ro mga maeain nga batasan ku ruyong kapanugid-sugid ag itsismis man imaw sa anang kaibahan. Busa ano ro matabo? Gulo.

Ag ro ginatsismis nga tawo hay madueaan it respito sa ibang tawo. Ang ro nagakalat it tsismis hay basi paeayuan it ibang tawo ay basi sanda man masunod nana nga itsismis.

Busa ano ro mayad nga himuon kon matabo katon ra?

Mangayo’t bulig sa tawo nga masaligan mo. Sugiran  mo imaw sa ginabatyag mo. I-update mo imaw sa mga masunod nga nagakaeatabo maski gahagan-hagan eon ro pagpakahuya kimo agod mabanabana nana kon ano ro mayad nga himuon agod matapna eon ro pagtsismis kimo.

Magpili ka it amigo nga magtinir kimo ag owa gapamati sa ginatsismis kimo. Maghimo it mga bagay nga makapasadya kimo agod malipatan mo ro mga tsismis.

Prankahon mo ro tawo nga nagatsismis kimo. Kon maagtunan mo imaw hay sugiran mo imaw, sa matawhay nga paagi, nga owa mo nailaan ro ginapaeapnag nana nga tsismis. Pagkatapos nga mahambae mo eon ring gusto hambaeon kana hay, maghalin ka. Indi eon kinahangean nga maghueat ka pa kon ano ra isabat kimo. Mayad ron agod mabanabana na kon mayad o maeain ra ginahimo kimo.

Sa katapusan, agod indi mag-eain ro buot ku imong isigkatawo, mayad pa nga kiputon mo eon lang ring baba kon owa ka ma’t isugid nga mayad sa mga kaibahan mo agod matiner ro inyong pag-ililiba.