Kon Ugsad, istorya

Kon Ugsad
Ni Melchor F. Cichon
August 23, 2015

Ugsad. Nagbuka ro bungsod.
Nagguwa si Haring Itsong ag si Reyna Saring, ro itom nga hari ag reyna it mga duwende.
Nagpamasyar sila sa Lezo Plaza.
Hakita nanda ro sangka unga nga babaye nga nagapupu ku bueak it Sampaguita. Si Ambong ra ngaean, mga dose anyos ra edad.
Nag-ilis it ordinaryong eambong ro reyna ag nag-ilis it puti nga panit.
Ginpaeapihan nana si Ambong.
“Ambong, gina-ano mo ro bueak it Sampaguita?”
“Ginahimo ko ra nga kolentas ag ginabaligya sa may simbahan agod ibakae it bueong ni Nanay. Ginaeagnat abi imaw.”
“Tanan nga bueak nga napupu mo, bakeon ko tanan!” hambae ku reyna. “Hara ro sangka puyo nga bueawan.”
"Matuod, 'Nay?"
Ginbaton ni Ambong ro bayad.
“Abu gid nga saeamat, ‘Nay.”
Nag-uli si Ambong ag ginhabaean ra nanay nga bastante eon ro andang kwarta nga inugbakae it bueong.
Nagmayad sa masakit ra nanay ni Ambong.
Pagkataliwan it limang dag-on, nabantog nga namatay ro reyna.
Nadumduman it hari si Ambong. Ginkailaan ku hari si Ambong ag sa kada agto nana sa baeay it daeaga, ginaregaluhan nana it bueawan nga kobyertos. Ugaling indi si Ambong sa hari. Owa’t eabot nga maitum ro duwende, basi hibaygan eang imaw it mga tawo.
Pero sa ulihi hay nahueog gid man ro buot ni Ambong sa hari ag ginkasae sanda sa kaharian it duwende sa idaeum it eugta.
Kon ugsad, ginaingganyo it hari nga magbisita si Ambong sa anang nanay.