Total Pageviews

Search This Blog

Monday, March 20, 2017

Flash Fiction: Handum

Handum
Melchor F. Cichon

Bangud gusto gid ni Lando nga makilaea bilang isaea nga mayad gid nga manugletrato, nag-intra gid imaw sa isaea nga paindes-indes it letrato agud mag-abu ra anang kleyente sa pagphoto-shoot. Busa pagkabati nana nga may national contest sa letrato hanungod sa palibot, nag-intra gid imaw. Agud makasubmit imaw it manami gid nga letrato, nag-agto imaw sa mabahoe nga unibersidad kon siin may koleksiyon it daan nga Life Magazine ag National Geographic Magazine. Igto nagtinan-aw gid imaw it mga letrato hanungod sa palibot. Sa ulihi hay may hakita gid man imaw nga isaea ka prize winning picture. Ginletratuhan nana ra ag gindaea sa anang amigo nga si Ambeth. Eksperto gid si Ambeth sa photoshop agud maretoki gid nanda ra hapili nga letrato. Samtang ginaretoki nanda ro letrato hay nagpromisa si Lando kay Ambeth nga kon magdaug gid man imaw hay tungaon nanda ro premyo, kon magdaug gid man imaw. Pagkatapos nga maretoki nanda ro letrato hay imaw ra ro ay Lando nga gin-intra sa paindis-indis.
Ag nagdaug imaw.
Pagkabuoe nana ka premyo hay nagpaManila imaw nga owa gid nana gin-agtunan si Ambeth maski magpasaeamat gid lang.
Sa kaugot ni Ambeth hay nagpadaea imaw it sueat sa organizer it contest. Gin-apid nana ro kopya ku original nga letrato. Mayad eang ay owa ginpaea ni Ambeth ro kopya it original nga letrato nga gindaea ni Lando kay Ambeth. Pagkatapos nga maimbestigar ro complaint hay napamatud-an nga ginplagiarize gid man ni Lando ro anang entry. Bangud kara hay ginbawi it organizer ro premyo kay Lando.

No comments: