Kahit Na

Ni Melchor F. Cichon

Kahit tusukin pa ang Aking laman ng araw,

Yayakapin Ko pa rin ang hapdi

Ng tatlong pakong

Imamartilyo sa Aking mga palad at mga paa

Kung iyon lang ang paraan

Upang ang mga anluwagi’y

Makiisa sa Akin.

Lunukin Ko pa rin

Ang apdo na isalangsang

Sa may putok Kong mga labi

Kung iyon lang ang pinakamagaling na paraan

Upang hugasan ang kasalanan ng sanglibutan.

Kabigin Ko pa rin

Ang pagsaksak ng sibat sa Aking tadyang

Kung iyon lang ang paraan upang mabuksan

Ang pananampalataya sa Akin.

At kung sakaling hilahin na Ako ngayon ng kamatayan,

Tatanggapin Ko pa rin ng may ngiti

Dahil sa madaling panahaon

Sasama Ako sa iyo

Ng walang hanggan doon sa kalangitan

Ayon sa Banal na Kasulatan.