Kon Ugsad

Kon Ugsad

ni Melchor F. Cichon
first draft

Ugsad.

Nagbuka ro eugta. Ag nagguwa ro hari ag reyna it mga duwende.

Nagpamasyar sanda sa Plaza it Lezo.

May hakita sanda nga gwapahon ng ungang baye nga nagapamueot it bueak it mga narra.

Nag-ilis it ordinayong eambong ro reyna ag ginpaeapitan ro unga. Ginpangutana it reyna ro unga.

“Ham-at ginapueot mo ro mga bueak it narra?”

“Ginapueot ko ra agod himuon nga kolentas ag ibaligya sa may simbahan agod ibakae ko't bueong ni Nanay. Magsakit abi imaw.

Ginbakae it reyna ro tanan nga bueak nga napueot it unga. Sangka puyo nga mga bueawan ro gintao it reyna sa unga. Nagpasaeamat ro unga sa reyna ag nag-uli.Ginsunod ka tueok ku reyna ro pagpanaw ku unga.

“Inay, bastante eon ro atong kwarta nga inugbakae it imong bueong. Ginbakae it sangka baye ro tanan nga bueak it narra nga hatipon ko.”

Owa magbuhay hay nagmayad ro nanay ku unga.

Pagkataliwan it limang dag-on hay nabantog nga namatay ro reyna it mga duwende.

Nagbalik sa piniio ku hari ratong unga nga hakita nanda sa plaza.

Gintawag ku hari ro anang mga sundalo agod hisayran kon siin gaestar ratong bayeng hakita nanda sa plaza.

“Mahal nga hari, igto gali sa Sta. Cruz gaestar  ratong unga. Si Ambong kuno ra ngaean.

Kada hapon hay ginaagtunan it hari si Ambong ag ginaregaluhan it mga kobyertos nga bueawan.

Sa ulihi hay nahueog gid man si Ambong sa hari.

Ag nagpasugot imaw nga magmunot imaw sa kaharian it mga duwende, igto sa idaeum it eugta.

Hakita ni Ambong nga haeos tanan nga mga kakamitan sa kaharian it dwende hay himo sa bueawan, halin sa kabkab hasta sa andang lamesa.

Ugaling ginapanumdom ni Ambong ra nanay. Pero ro hambae ka nanay hay indi imaw magbakho kana ay may daywa pa man imaw nga mga magueang nga magadipara kana.

Ag ginapabisita man ku hari si Ambong sa anang nanay sa kada ugsad.