Bukon Man It Bulag si Juan

Bukon Man It Bulag si Juan
Ni Melcichon
Oct. 3, 2012
revised: Oct 3, 2016

Bukon man it bulag si Juan
Bukon man imaw it apa
Bukon man imaw it bungoe
Ugaling ginbusaean,
Ginbuta-butahan
Ag ginsuesugan ra dueongan.

Ahay, masueat eon lang kuno imaw
It binaeaybay hanungod
Sa adlaw nga ginatabunan it gaeum,
Hanungod sa suba nga daeag ro gasueog nga tubi,
Hanungod sa eawod nga may gaeutaw-eutaw nga balyena.
Hanungod sa mga eutayon nga karsada.

Indi gid kuno pwede magsueat
Hanungod sa mga nagakatunaw nga pundo it gobyerno,
Sa mga patayan sa kalye,
Sa mga death squad,
Bangod sa druga.
Ag kueang pa kuno ra.
Owa pa ngani kuno mapaea ro rekord ni Hitler
Sa pagpatay sa mga Hudeo.

Ahay...
Magpanihoe eon lang si Juan
Agod magbaskug ro huyop it hangin,
Agod ra bulador hay magtaas ra eupad.