Pag-eaom Ni Inday
ni Melchor F. Cichon
December 25, 2020
Pag-eaom ni Inday
Hay mas manamit ro sabaw
Nga mahigup na
Sa Ermita
Ku sa tinuea nga gina-eaha ni Nanay na.
Busa nag-eumpat gid imaw
Sa pantaw
Agod maka-eaas
Sa dayok
Ag kamote.
Pag-eaom na
Nga ro pataw
Nga maangkit-angkit na
Sa naga-idlap-idlap
Nga siyudad
Ay madilap-dilapan na.
Pag-eaom na
Hay mas mahayag ro ugsad
Sa gapueaw nga siyudad
Ku sa buean sa kaeanasan.
Owa imaw kasayod
Nga mas mahugot
Ro pagbueabod it hueas sa liog na
Sa Manila
Ku sa kaeanasan.
No comments:
Post a Comment