Eampas Sa Likod It Pagkalipat

Eampas Sa Likod It Pagkalipat
NI Rolando Carbonell
Gin-Inakeanon ni Melchor F. Cichon
August 6, 2015


Sa sangka sigundo, pag-eaum ko malipatan ko ikaw.
Sa sangka sigundo, pag-eaum ko mapahuwayon ko rang tagipusuon.
Pag-eaum ko rang kahapon hay indi eon mag-usoy kakon—o magsakit kakon. Nagsaea ako!
Ay ro nagtaliwan, maski ano ra ka eayo, hay parti kang eawas pareho it kabuhi.
Ag parti ka kang kabuhi.
Kaibahan ka gid kang kabuhi—ku ang mga panamgo, kang mga handum, kang pagkabata, ag kang ambisyon—nga sa tanan ko nga mga ueobrahon indi mahimo nga indi ko ikaw madumduman.
Rang mga maintok nga kalipayan, rang mga butang hay nagapanumdum kimo.
Huo, nag-abot ako.
Ag sunlugon baea kang bugae rang matuod-tuod nga ginabatyag?
Baea ro kantang panghigugma, ro matam-is ag mahigugmaon nga hiyum-hiyum sa imong uyahon,
Maduea sa nagadueom nga mga handong?
Gusto ko gid nga mag-isaeahanon.
Pag-eaum ko hay malipatan ko ikaw sa kalinong ag sa kanta.
Apang nadumduman ko.
Sin-o baea ro makalipat ku handumanan it sangka mahigugmaon,
Ku sangka maambong, ku sangka masinadyahon nga kalibutan paris ku aton?
Nag-abot ako bangud ro ginatago ko nga kanta sa maeawig nga dinag-on hay gahueat nga kantahon.
Indi ko ra makanta nga isaeahanon.
Ro kanta nga ginakanta eang nga isaeahanon hay nagakaduea ra kaimportansya it tuno, bangud ikaw ag ako hay nagtingob.
Gusto ko nga rayang kalisdanan hay maduea, bangud parti ko eon ra kang indi pagkahamtang.
Indi mo ra mahangop ay?
Indi mo masaysay ro kadaeum, ag ro kahugmayon kang baeatyagon kimo?
Huo, indi mo baea makita rang pag-antos sa rayang owa't katapusang kadueom nga owa ka?
Nagpanaw ka bangud ring pag-eaum sa paghipos ko ay owa’t paghakat.
Apang ro paghipos, mahae ko, hay lenggwahe it tagipusuon.
Paano ko ipahamtang ro kabaskug kang pagmahae kon ro kalinong hay nagamitlang it mas matandos nga limog.
Apang siguro indi mo mahangop.
Panumdumon mo, nag-abot ako, bangud ro gait-it nga kamingaw hay iya
Ag indi maduea hasta ro musika hay indi makanta,
Hasta ro binaeaybay hay indi mabatian,
Hasta ro kahipuson hay indi maintindihan—hasta sa pagbalik mo kakon.
Bangud ikaw eang ro makahaeugay ku musika ag handumanan sa isaea ka makatueonaw nga kalipayan.
Ikaw gid lang.