Pagkatapos Nga Magsanga

Pagkatapos Nga Magsanga
Melchor F. Cichon
December 25, 2015

Pagkatapos nga magsanga
Ro atong daean,
Nagsobeang gid man kita’t uman.
Apang owa gid magsobeang ro atong mga mata.
Nag-eain eon gid man ro atong pagtueok
Sa kada isaea,
O ring pagtueok eang kakon.
Pero kon madumduman ko
Ro atong kahapon
Kon siin pareho eang ako
Sa aso nga gasunod-sunod sa huyop it hangin,
Ugaling sa pag-abot ko
Nga sa panan-aw ko igto ka gid man,
Nakahalin ka eon man gali.
Apang sige eang rang pagsinunod-sunod kimo
Hasta nadaphag ako sa eunang
Nga gin-agyan mo.
Ag owa mo gid ako
Ginbuligan sa pagtindog.
Owa gid maski ginlingutan eon lang.
Pero sige eang makon,
Makabangon gid man ron ako.
Ag sa pagtindog ko,
Hakita eon man kita.
Pero owa ka man gihapon
Maski magtueok eang kakon.
Nahuya man ako magpaeapit kimo
Pares ku gae-um sa buean
O pareho ku tubi sa busay
Nga nagaduylon panaog paagto sa sapa
Kon siin anay kita gaeagsanay
Kon tigsililak.
Sige eang makon
Dumdumon ko eang
Nga abot-tan-aw ka
Sa kabuhi ko.