Akeanon Ako

Akeanon Ako

Ni
Maeara
July 31, 2011


Hasayran ko ro Akean.
Ag ro anang pag-alimbugae
Agod makahakos ag maka-imaw
Sa anang nanay nga eawod.
Ag ro kumpoe kuno nga dila
Kang kalolololohan.
Aba, maaeam gid sanda
Mag-inbento ku hambae kong ginhalian.
Ag ro kodigo ni Kalantiaw
Ginhimo-himo eang kuno
Ni Jose E. Marco.
Siin baea si William Scott
Ag si Ambeth Ocampo
Ay luwahan ko.


Hasayran ko ro Akean.
Ag kon paano ginsuyop
Ro Akean it Capiz.
Aba, ro magkae
Gaeuad ku anang ginatueon
Kon indi nana ra matunaw.

Hasayran ko ro Akean.
Ag ro ginhimo ni Heneral del Castillo
Ag ni Goding Ramos
Agod kita mataw-an
It ngaean.

Hasayran mo ro Akean?
Agod ikaw ag ako
Mangin Akeanon?