Maghueat Eang Kuno Kita

 by Melcichon

June 16, 2012                

 

Hueat…

Maabot gid kuno ro atong oras

Nga makasueod kita sa mga malls,

Makatindog sa emtablado ag magdiskurso

Ag makasakay man sa barko ag sa eroplano.

Maabot gid kuno ro atong oras

Nga kon mag-abot ro Presidente it Pilipinas

Indi eon kita pagtipunon sa Guimaras--

Mayad pa ngani kuno ro uhay

Ay kon maeunot, abono ra it paeay.

Mag-hueat eang anay kuno kita

Ay sa ulihi may patindugon nga eskuylahan

Sa atong barangay.

Owa gid abi kuno kita’t nahibadwan

Maski magsueat eang ku atong ngaean.

Mag-inunga eang kuno ro atong hasayran

Ag indi man naton sanda masarangan

Mapakaon, mapaiskuyla, mabistihan.

Dugang eang kuno kita sa pagdagaya’t tawo sa kalibutan.

Kon patindugan abi kuno kita’t ilistaran

Aton man eagi kuno ra nga ginaaywan.

Owa gid sanda kaeubot

Nga buko’t baeay eang ro atong ginakinahangean.

Paris kanda gusto man naton nga may obra, may pangabuhian

Agod indi eon kita mag-agwanta

Sa init ag sa uean.

Indi eon kita mag-agwanta

Nga owa’t ilabas, owa’t ihapon,

Agod indi eon kita

Mag-agwanta sa mga tueok nga mataeum

It kapwa Pinoy  nga mga kadugo man lang naton.

Indi eon kita makit-an nga gabitbit ku atong eabsag

Ag magpakalimos sa mga simbahan, sa mga daean.

Ag kon mag-abot ro gabii

Indi eon kita mag-eugad sa mga tapu-tapuhong waiting shed--

Total imyon eon man kita sa pneumonia, sa dengue.

Paghueat eang baea

Ro masarangan ku atong gobyerno?

Pero kon eleksiyon

Ginabagtas gid it mga kandidato

Ro mga madanlog nga kaeanasan;

Ginaubog ro mga suba nga eutayon

Makalamano eang katon

Agod aton sanda nga botohon.

Pagkatapos it eleksiyon,

Sin-o kita?

Eutay, bato, ag mga boho sa highway.

Mga sueonugong eaay nga halimunon sa lagwerta.

Ano ro atong ipanubli

Sa atong mga inapo?

Paghueat eang ag pag-agwanta?

----

January 1, 2004