Ano Man Ang Hambalon Nila

Ano Man Ang Hambalon Nila

Ni Sean Marie Andrin Cichon

Inay, hambal ni Tita Agnes mabudlay kuno magpuyo sa banwa ta.
Maayo pa kuno sa America kay ginapala ang kwarta,
Indi pareho sa aton nga banwa:

Madamo kuno nga kidnaper, hold-upper

Kawatan, kag snatcher pati kuno si gobernador kag si senador.

Inay, nga-a hambal ni Tito Dolfo kalahadlukan kuno magpuyo sa atong banwa
Kay madamo ang tiniruhay sa siyudad, sa kabukiran.

Maayo pa kuno magpamutsatsa sa Hong Kong, sa Iran

Kay madamo ang kwarta indi pareho sa banwa ta

Nga madamo nga mga bata nga indi maka-eskuyla

Madamo nga mga bata nga may mga kabataan na.

Hato si Doktor, si Engineer, si Architect

Didto sa America, sa Englatera, sa Italya naga-obra

Kay diri kuno sa Pilipinas ang pangabuhi agwanta.

Kun tani kuno kita tanan gabululigay

Agod indi magdugay mapareho man kita

Sa Singapore, sa Japan, sa America nga mauswag.
Amo na Inay nga permi ka nagapanghayhay?
Siling nila ang aton nga ulumhan, dagat kag kabukiran malapad pa,

Galing uhaw kuno sila sa aton nga pagdipara.

Tani indi na kuno kita magbakal sang mga produkto sa iban nga banwa.

Kun tani maghiliugyon ang mga NPA, ang Abu Sayap sa gobyerno ta
Para ang katawhayan, ang kalinungan maagum na.

Kun tani si Sir kag si Ma'am indi na mag-obra sa iban nga banwa

Kun tani wala na sang mga kawatan sa palibot ta
Agod mag-uswag kita.

Kag magdamo ang mga turista nga magbisita sa banwa ta.
Apang, Inay, kun ano gid man ang madangatan
Sa pinalangga natong banwa
Sa gihapon, siya ng number one
Sa mga handum, sa mga  paglaum ko.
Kabay pa!