Sa Mga Nagkalabali Nga Silak

Sa Mga Nagkalabali Nga Silak

Ni Melchor F. Cichon

gumamilacruz@yahoo.com

as of April 12, 2014

Yolanda

Ay, sos.

Kahapon

Tanan sila nga nakahigda

Sa mansyon
Kag sa may tuktukon nga sin

Nga kon sa diin-diin nga ulot napulot
Kag gahuyum-huyum pa
Bangod sa mga drama ni Napoles
Kag sang iya nga mga apostoles
Subong ginapulot na sila
Sa kon diin-diin lang
Bangud sa storm surge.

Ini bala isa ka pagpahanumdum
Sang Langit
Sa waay untat
Nga pagpinukan sang kakahuyan,
Sa waay untat
Nga pagsisunog sang kabukiran?

 San-o Pa?

Abi ko makahuragok na ako

Pagkatapos sang baha sa Edsa,

O maglinong na ang baybayon

Pagkataliwan ni Ruping.

Abi ko makalupad-lupad na

Ang mga pating

Pagkatapos maigo sang linti

Ang kagulangan sang  Malinao.

Gali kay makurog man gihapon ang atay ko

Bisan mahayag ang ugsad.

Gali kay gawaras man gihapon ang baybayon

Bisan ang unod ko ginatuslok sang adlaw.

Ang mga pating

Padayon man gihapon

Sa ila nga pagkinuobkuob

Bisan waay na sang ginalumloman.

San-o pa ako makahampang sang  tinubigan man

Bisan waay sang bulan?

San-o pa ako makatulog sang mahamuok

Kon may lumot na ang akon tutunlan?

Sa Pilapil  Sang Tangke

Gatindog ka nga ginakagat ang bibig mo

Sa pilapil sang tangke ni Don Pepe.

Ginasipadsipad mo ang mga dahon

Sang bakawan nga anay nagakadunot

Agud butitihon ang mga similya sang isda,

Sang ulang kag kalampay

Nga nagapasapnay

Sa malinong nga handong.

Nagalitik ang bibig mo

Kay ang bubon nagmala

Agud patambukon

Ang lukon ni Don Pepe

Agud pabustikon ang Hapon

Samtang kita

Kun may mabilin pa nga ulo sang lukon

Amo ina ang aton nga baklon.

Tay Itsong,

Matindog ka na lang bala

Sa pilapil ni Don Pepe?

Limog Sa Idalom

Gindinamita liwat kita,

Indi man kita NPA

O preso nga nagpalagyo sa silda.

Si Mary Concepcion indi pa abi

Magkadto diri.

Nga-a ginahingabot gid kita?

Waay man kita gamartsa.

Galangoy-langoy lang man ang obra ta.

Kon makasulod kita sa punot

O magtalang sa fishcoral,

Sala man naton ina

Kay indi kita kahibalo magbasa.

Pero masakit, grabe gid

Kon palokpan kita.

Waay man kita sang M16

Nga ibalos sa ila

Kag indi lang kita ang madisgrasya.

Tanan sipot, pati ang ilitlogan

Tumba.

Ano bala ang  ilang isabat

Sa Limog sa Ibabaw

Kon sa ulihi

Magkilita sila?

Manug-Uling

Balikda bala, Tyo Pablo

Ang bukid nga inagyan

Sang lagare kag wasay mo.

Tan-awa bala ang iyang itsura...

Daw likod sang kalaha

Nga bisan kugon

Waay na sang makapyutan.

Kag kon mag-ulan

Galigid ang kalibutan.

Tyo Pablo,  bastante bala

Ang ginansiya mo sa uling

Para ibakal sang troso kag semento

Agud isugpon sa naanuran

Nga tulay sang karsada?

Sa Mga Nagkalabali Nga Silak

 Inay, puwede na bala kita magpamisa?

Total nagataliti na lang man kag ang baha waay na sa kalsada.
 Ang linti nga anay nagsiad-siad sang langit napalong na.
 Ang daguob nga anay gabayo kang dughan haumpawan na gid man.

Kag ang baybayon nga anay nagwenaras, nagahulagok na.
Ang balangaw nga nagpanago sa kilat

Kag sa nagahagunos nga hangin
Nagahuyum-huyum na sa sidlangan.

Suyodon dayon naton sa karsada, sa ulumhan, sa kagulangan
Atong mga silak nga nagkalabali, nagkalataktak
Sa  paglusot sa madamol kag maitum nga gal-om
Masabwagan lang kita sang kahayag.

Kon sila aton nga makit-an,

Halaran naton sila sang lab-as kag bag-ong buskad nga Sampaguita.

Kon may matipon na kita nga kuwarta, patindugan naton sila

Sang graniting rebolto sa plasa.

Toto, indi lang anay kita magpamisa kay ang kaagahon garagiik pa
Kag ang kalangitan sa pagtunod sang adlaw mapulapula pa.
Maayo pa mangamuyo lang anay kita nga ang makalusot nga silak

Sa maitum kag madamol nga gal-om

Indi magtiurok sa tagipusuon ta.

Tabang!

Waay pa kasinggit

Ang Kalibutan

Sang  "Tabang!"

Apang ang Iya paandam
Maathag.

Nagalitik nga mga talamnan.

Ginalahar nga kalye sang syudad.

Red tide.

Yellow rain.

Apang waay  sang nagasapak sini.

Masaku ang tanan sa paghimo sang missiles,

Sa pagpatindog sang megamol,
Sa pagtapas sang kakahuyan,

Sa paghaboy sang insektisayd sa suba,

Sa paghulom sang formalin sa repolyo,

Sa paglagas sang piso sa Mabini,

Sa Ermita, kag sa Baclaran.

Ang paandam sang Kalibutan maathag,

Ugaling waay sang nagasapak sini.

Bangud siguro

Kay waay pa Siya kasinggit

Sang "Tabang!"