Total Pageviews

Search This Blog

Thursday, August 04, 2016

Si Juan Posong, Sangka Maestro

Si Juan Posong, Sangka Maestro
Ni Melchor F. Cichon
 August 3, 2016
Sangka agahon sa klasrom it mga estudyante nga Grade 4. Nagalingkod ro mga estudyante sa andang mga lingkuran. Isaea sa mga estudyante hay si Juan Tamad. Owa magbuhay hay nagsueod si Juan Posong ag naglingkod sa lingkuran it tetser.
 “Mayad-ayad nga agahon, Sir,” hambae ku mga estudyante.
 “Mayad-ayad man nga agahon kinyo,” sabat ni Juan Posong.
 “Ako ro inyong tetser,” hambae ni Juan Posong.
“Klas,” padayon ni Juan Posong, “ipaguwa ninyo ro inyong lapis ag papil ay may ipadrawing ako kinyo.”
“Ano ro inyong ipadrawing kamon, Sir?”,  pangutana ni Juan Tamad.
“OK. idrawing ninyo ro anwang nga nagapaligos sa suba. Pagkatapos it 30 minutos hay ipasa kakon ninyo ro inyong mga papel.”
“Yes, Sir!” kuros ku mga estudyante.
Pagtapos it 30 minutes.
“OK class, pass your papers,” hambae ni Juan Posong.
Tag natipon eon ni Juan Posong ro mga papel hay ginpangtan-aw na ro mga obra ku mga estudyante. Hakita na ro obra ni Juan Tamad.
“Juan Tamad,” hambae ni Juan Posong. “Ham-at sangka kuris eang ro imong ginsueat sa papel mo?”
“Sayod ka, Sir,” sabat ni Juan Tamad, “nag-eunip ro anwang. Imaw ron nga indi mo makita ro anwang!”
 “Ah, OK!” sabat ni Juan Posong, ag ginpakita nana ro obra ni Juan Tamad sa anang mga kaklase.
Naghinibayag ro mga estudyante.
“Sir, Sir,” hambae ni Juan Tamad.
“Yes, Juan,” ano ron?”
Nagtindog si Juan Tamad ag nagpangutana kay Juan Posong.
“Sir, matuod gid baea nga ikaw ro amon nga tetser?”
“Huo. Ako. Busa indi gid kamo magsangag ha ay paagtunon ko gid ro inyong mga nanay sa Principal’s Office kon magsangag kamo.”
“Yes, Sir!”
 “Pero Sir,”padayon ni Juan Tamad, "hakita ko ikaw kahapon sa pihak nga kwarto nga nagalingkod sa klase ni Sir Bartolome.”
“Hipos,” hambae ni Juan Posong kay Juan Tamad.
Mahambae pa kunta si Juan Tamad ugaling nag-abot ro sangka maestra.
 “Good morning, class.”
 “Good morning, Ma’am. ”
“Ako ro inyong tetser sa rayang klase. Ako si Tetser Luchie Magalang."
Gintueok ni Tetser Luchie si Juan Posong nga nagalingkod sa lamesa it tetser. Estudyante na anay si Juan Posong ku isaeang dag-on sa Grade 5.
“Juan, ham-at iya ka sa among klase? Bukon abi’t igto ka sa pihak nga klasrom? Sige, guwa eang anay palihog.”
 “Yes, Ma’am,” ag gulping dumaeagan si Juan Posong paguwa it kwarto.
Naghinibayag ro mga estudyante pagguwa ni Juan Posong.

No comments: