Flash Fiction--Magnitude 6.9

Magnitude 6.9

Ni Melchor F. Cichon

gumamilacruz@yahoo.com

Samtang nagalinog it 6.9 magnitude ro sangka kama it dormitory, may nagpanuktok sa pwertahan it sangka kwarto kon siin si Magda ga-overnight. Gulpi nga nagtindog si Albert ag ginputos it gusuton nga haboe ra idaeum nga parte it anang eawas ag ginbuksan ro pwertahan.

Si Ann, anang asawa, ro sa pwertahan. Nagmodlo ra mga mata sa kaakig pagkakita na sa sitwasyon ni Albert. Nagdugang pa gid ra pagsilabu ka anang dughan pagkakita nana kay Magda nga nagalingkod sa kama nga ginatabunan ra dughan ka anang palda, ag ra buhok ay paris it inagyan ni Bagyo Frank.

Sa kakibot ni Albert, nabuhian nana ra ginabuytan nga haboe ag nahueog ra sa saeog—nakita ra bilog nga kaeangitan nga may nagatueo-tueo pa nga asaw-asaw.

“Raya gali,” hambae ni Ann, “nga absent ka sa imong opisina ay eain gali nga buho ring ginsudlan? Ag ikaw nga baye ka, owa ka gid it huya. Paris ka gid kay Eva Magdalena nga owa kaihapon it hotdog. Dali ay patunlon kita it chorizo kang pusil! Nagbalik ka gali riya sa Iloilo agod magkaon it hotdog ha!”

“Husto eon ron, Ann,” hambae ni Albert. “Owa kami’t gin-obra nga maeain. Pati ka baea kakon. Magkalma ka eang anay.”

“Pati gali ha! Kalma gali ha!”

Ginkrak ni Ann ra .38 caliber pistol ag ginpuntariya kay Magda.

Humapa si Magda sa kama.

Gin-agaw ni Albert ro pusil kay Ann, ugaling pwersado si Ann. Ag eumupok. Mayad eang ay ro kisami eang ro naigo.

Sa ulihi, naagaw gid man ni Albert ro pusil. Ginhaboy nana ra sa bintana.

Nagtangis si Ann. Ginkupkupan imaw ni Albert. Ag naghambae nga mauli eon sanda. Nagtango eang si Ann.

Mangan-angan, nag-abot ro tatlo nga UPV Guard. Ginpangutana si Albert kon ano ro natabo.

“Chief,” hambae nana, “owa man ah. Nagdrama eang si Mrs. May rehearsal sanda hindunang gabii sa Theater ag sambilog sa mga eksena igto hay may barilan.”

“Ah, OK. Sige, bye.”

Nagtindog si Magda. Nagpaeapit imaw kay Ann agod mangayo it pasensiya. Apang hinampak eang imaw sa uyahon. Owa magbaeos si Magda. Nagbalik eang imaw sa kama. Ginhikap nana ra uyahon.

Mangan-angan, gin-agbayan ni Albert si Ann ag nagpanaog sandang daywa paguwa sa dorminotory.