Ay, Sus!

Ay, Sus!
ni Melchor F. Cichon.
May 19, 2018

Gahiyum-hiyum ako
Sa kada uli ko sa Lezo.
Owa't eabot nga nagadueotdutan
Ro mga pasahero,
Nagainundag-undag pa ro jeep pag-abot sa Lezo.
Indi man abi maghalin ro jeep sa terminal it Kalibo
Kon indi sardinas ro mga pasahero.
Gahiyum-hiyum ako sa kada uli ko sa Lezo
Ay ginakaayad eon ro karsada halin sa Numancia paagto it Lezo..
Haeos one-way eon lang ngani
Ay habuldozer eon ro katunga it karsada
Ag ro karatula nagabaeakang sa karsada:
"Drive slowly
Men and Equipment
Are working."
Pero siin ro "Men"?
Siin ro "Equipment"?
Owa man!
Owa gid ako't hakit-an!
Maski anino eon lang.
Basi sa pilang adlaw
Gabunga eon ro saging sa ruyon nga karsada.
A, basi gin-untat bangod sa eleksyon.
O basi natueon it bueaeakaw ro budget!
Kabay pa
Nga ginapatubo pa ra.