Saeamat Gid Ginoo
***Melchor F. Cichon
Oct. 15, 2022
Saeamat gid Ginoo
Sa pagtao Mo't kahigayunan
Nga makaagi ako
Sa rayang kalibutan.
Makaagi ag makapamati
Sa mga huni't mga pispis
Sa kabukiran, sa kaeanasan.
Makaagi ag makakita
It buean, it adlaw
Maski kon amat
Hay ginatabuan ra't maitum nga gae-um.
Makaagi ag mabatyagan
Ko ro kaeamig ag ro kainit
Ku hangin, ku adlaw
Ag ro pagkupkop kang Nanay ag kang Tatay
Ag kang mga unga ag kang asawa.
Saeamat gid Ginoo
Ay ginpaagi Mo ako
Sa kalibutan ngara
Agod mabatyagan ko
Kon ano kasadya
Nga makabulig ako sa pagpatindog
Sa sangkatawong natumba,
Sa pagpaugwad ku literaturang Akeanon,
Agod mabatyagan ko ro katam-is it dugos
Ag ro kaap-eod it apdo't pangabuhi.
No comments:
Post a Comment