Abu Gid Nga Saeamat, Papa
ni Melcichon
January 16, 2015
Abu gid nga saeamat, Papa.
Kon ro among mga kalye hay bukon it abortion road.
Kon ro LRT o ro amon nga MRT hay bukon it maarte
Kapin pa gid kon nagadueotdutan ro mga pasahero
Ay gulpi eang ron mapundo--may guba kuno nga linya.
Ahay, abaw manaog kuno ro presyo it gasolina
Pero sa pilang adlaw ra pagsaka hay
Mas doble pa sa anang pagpanaog.
Owa kuno it barilan sa kabukiran
Sa pag-abot mo, Papa.
Pero pamatii eang ro linopok.
Ag tan-awon mo kon ro mga pitaka
Sa buesa o sa bag it mga kasimanwa ko
Hay owa gakaeaduea
Samtang gahinueat sa karsada sa pag-agi mo.
Abu gid nga saeamat, Papa
Ay nagbisita ka sa among banwa--
Banwang tadlong gid kuno ra daean.
Ro inagyan ni Bagyo Yolanda ag ni Bag-o Seniang
Hay amat-amat nga nagakapanas eon.
Ag sa pag-abot mo Papa,
Nagkaeaduea ro mga papel sa mga kalye,
Nagkaeaduea ro mga tong-pulis,
Kaibahan eon kuno ro mga pobreng nagapakalimos
Ag ro mga unga nga gapalibot-libot sa karsada.
Igto kuno sanda gintipon sa House of Hope.
Hadumduman ko kon may Dinagyang
Ginahakot man kuno sa Guimaras ro mga matuod nga Ati.
Matadlong eon gid man siguro
Ro amon nga daean.
Ag basi ro mga huya-huya sa amon nga pilapil
Hay magkaeaduea eon gid man.
Ugaling basi pagtaliwan mo, Papa,
Mabalik eon man ro tong-pulis
Sa amon nga karsada.
Mapundo eon man ro mga saeakyan
Sa tunga it mga pedestrian lanes.
Magbalik eon man ro barilan sa kabukiran,
Ro paghaeabuyan it eunang sa kongreso.
Ag basi matiko gid it husto ro atong daean.
Ag madugangan pa gid ro mga baril ag druga
Sa Bilibid Prison.
Abu gid nga saeamat, Papa,
Sa imong pagbisita sa Pilipinas.
Nag-ueogyon ro mga Pilipino
Maski sa lima eang kaadlaw.
No comments:
Post a Comment