Aesop's Ro Guyom ag ro Alisiwsiw

Ro Guyom ag ro Alisiwsiw

ni Aesop

Gin-Inakeanon ni Melchor F. Cichon

December 23, 2015

Sa sangka maeamig ag mayeluhon nga adlaw, ro guyom nga nagtago it pilang bilog nga mais ku tagsililak hay nagpaguwa it pilang bato kara agod magmaea.

Ro alisiwsiw, nga haeos patay eon ag gutom nga gutom, nagpangayo it sanghungit nga mais agod masalbar ra kabuhi.

"Ano ring ginpang-obra ,"  pangutana ku guyom, "sa bilog nga tig-ilinit?"

"O," sabat ku alisiwsiw, " Owa man ako nagduhong, a. Nagkinanta ako sa bilog nga adlaw."

Naghibayag ro guyom ag, samtang gatipon ka mais, naghambae, "Bangod nagkinanta ka ku bilog nga tig-ilinit, pwede ka man magsinaot sa bilog ngara nga tin-eamig."

Leksiyon: Indi naton dapat palampason ro uportunidad.

Gitanjali 27

Gitanjali 27
Rabindranath Tagore
Gin-Inakeanon ni Melchor F. Cichon
December 22, 2015

Kahayag. O, siin ro kahayag? Sindihan ra sa nagadabdab nga kaeayo it handum!

May ona nga kingke galing owa gid it maski sangka igpat nga dabdab, makaruyon ring kapaearan, tagipusuon ko! Ah, mas mayad pa ro kamatayan para kimo!

Nagtoktok sa pwertahan ko ro kalisud, ag ra mensahe hay mahueat ro imong , ag ginpatawag ka nana agod sa sangka pagtatagpo  sa tunga it kadudueman it gabii.

Ginahabuean ro kaeagitan ag owa’t  paghueaw  nga uean. Owa ako kasayod kon ano ro nga nagahaeugay kakon, owa ako kasayod kon ano ra buot hambaeon kara.

May sangka siglab it kidlat nga nagdaea it mas madaeum nga kalisud sa panan-awon ko, ag rang tagipusuon hay naghulikap ku daean kon siin ro kanta it gabii hay nagtawag kakon.

Kahayag, o siin ro kahayag! Sindihan mo ra it dabdab it kaeayo it paghandum! Nagdaeogdog ag ro hangin paagto sa  owa’t kapuseanan. Madueom ro gabii pareho it maitum nga bato. Indi pagsugti nga mag-agi ro mga oras  sa tunga it madudueman.  Sindihan ro kingke it paghigugma ku imong pangabuhi.

Gitanjali 28

Gitanjali 28
Rabindranath Tagore
Gin-Inakeanon ni Melchor F. Cichon
December 24, 2015

Ro Sutil Nga Ayam

Ro Sutil Nga Ayam
ni Aesop
Gin-Inakeanon ni Melchor F. Cichon
December 22, 2015

May sangka ayam nga masyado ka pintas ag sutil nga napilitan ra agaeon nga magbutang it lingganay sa anang liog agod mapaandam ra mga kaeapit ku anang maeain nga batasan.

Ro ayam, nga nagapabugae ka anang ornamento, hay nagparada sa tindahan, nga ginapatunog na ra lingganay agod makita imaw.  Apang ro maisut nga ayam, nga nagapamati sa mga libak ku mga nagapamantaw kana hay naghambae:
"Kon mas sangkire ring himuon nga sangag, mas mayad para kimo; ring lingganay hay nagtao eang kimo it maeain nga pamatasan sa imong kaeapit, ag owa't dapat nga ipabugae."

Leksiyon: May mga tawo nga sa pag-eaum nanda hay ro kasamaran it dungog hay nagapabantog kanda.

Para Sa Apo Ko

Para Sa Apo Ko

Ni Melchor F. Cichon.

December 22, 2015

Kahit pagod ako

At nakita kitang ngumingiti,

Para akong bagong paligo.

Kahit na wala na akong pambili ng pan de sal,

Kapag lumapit ka sa akin,

Upang humingi ng sampung pisong

Pambili ng Yakult o tahu mo

Ibinibigay ko ito sa 'yo.

Kahit na mahuli na ako sa aking trabaho

Kapag nakikita kitang umiiyak

Dahil alam mong aalis ako

Upang maghanap ng perang

Pambili ng gatas, diapher mo,

Nagpapaiwan muna ako.

Kahit na masakit na ang likod ko

Sa kakakarga sa 'yo lalo na kung may lagnat ka,

Sige pa rin ang pagkakarga ko sa 'yo.

Ok lang lahat ang mga ito,

Dahil ikaw Apo ang bituin ko.

Gitanjali 35

Gitanjali 35
Ni Rabindranath Tagore
Gin-Inakeanon ni Melchor F. Cichon
December 22, 2015


Kon siin ro panghunahuna hay owa't kahadlok ag ro ueo hay tadlong;
Kon siin ro kinaaeam hay hilway;
Kon siin ro kalibutan hay owa gid nagkaeapudpod bangod sa mga makitid nga mga baeaynong pader;
Kon siin ro mga bisaea hay gabutwa sa kaidadawman it kamatuoran;
Kon siin ro mga butkon nga owa't pagkakapoy hasta maabot ro pagkaperpekto;
Kon siin ro matin-aw nga busay it rason hay indi magtaeang sa maeuyang deserto it patay nga ugali;
Kon siin ro hunahuna  hay ginaagubayan paagto sa  nagaeapad nga pag-eaum ag paghueag--
Igto sa eangit it kahilwayan, akong Tatay, sugti ninyo nga rang banwa magbugtaw.

Ro May Sakit nga Lobo ag Ro Tiyo it Karnero

Ro May Sakit nga Lobo ag Ro Tiyo it Karnero

ni Aesop

Gin-Inakeanon ni Melchor F. Cichon.

December 22, 2015

Gintawag it sangka lobo nga may sakit ag indi makahueag ro nagaagi nga tiyo it karnero ag anang ginpangabay nga daehan imaw it tubi nga mainum sa maeapit nga sapa.

"Kon madeahan mo ako't tubi," hambae na, "ako eon eon lang bahala sa pag-usoy it karne para kakon."

""Abaw ah," sabat ku tiyo nga karnero. "Ay kon magpaeapit eon ngani ako kimo agod daehan ka't tubi, hasayran ko gid nga taw-an ka gid nakon it karne,"

Leksiyon: Mag-andam gid sa ipokrito(a).

falling leaves

falling leaves--
this is
life
***Melcichon
December 22, 2013

Ro Mga ayam ag Ro Mga Panit

Ro Mga ayam ag Ro Mga Panit

ni Aesop
Gin-Inakeanon ni Melchor F. Cichon

December 20, 2015

May pilang gutom nga ayam, nga owa ka tipon it husto nga panit nga ginbilin it manugpanit sa idaeum it sapa, nagkasugot nga imnon nanda ro tubi it suba ag basi man lang mabuoe nanda ro andang premyo. Nag-umpisa sanda't inum ugaling eumupok ro andang tiyan, pero owa gid nanda maabot maski sangka purgada ro mga panit.

Leksiyon: Ratong mga tawo nga nagagamit it saea nga paagi hay pwedeng matabu nga gob-on ra andang eawas sa pagtinguha nga maobra nanda ra.

Ro Leon ag ra Tatlo Nga Manugeaygay

Ro Leon ag ra Tatlo Nga Manugeaygay

ni Aesop

Gin-Inakeanon ni Melchor F. Cichon.

December 20, 2015

Gintawag ku leon ro karnero ag ginpangutana imaw kon mabaho ra hinhawa.

"Tama," ra sabat, ag ginpatay imaw ku elon bangod sa anang pinaumang nga sabat.

Gintawag na dayon ro lobo ag ginpangutana imaw ku pareho nga pangutana.

"Owa ah, owa gid," sabat it lobo; pero ginpanggunit-gunit man imaw gihapon bangod sa anang pagdayaw it sobra-sobra.

Sa katapusan, gintawag ni leon ro tumanggong* ag ginpangayo ra opinyon sa pareho nga pangutana.

""Maeain rang sip-on," ro tusong sabat it tumanggong, " ag indi gid ako makahugom."

Leksiyon: Ginabantayan it maaeam nga tawo ro anang dila.

*Tagalog term for fox.

Ro Alimango ag Ra Anang Nanay

Ro Alimango ag Ra Anang Nanay

ni Aesop

Gin-Inakeanon ni Melchor F. Cichon.

December 20, 2015

""Ham-at kon magtikang ka hay tiku-tiku, Toto?" hambae ka anang nanay. "Kinahangean nga magtuon ka't pagtikang nga diretso."

"Ipakita mo kakon ro paagi, Inay," sabat ka unga nga alimango, "agod kon hikita ko kon paano magtikang nga diretso, sundon ko."

Leksiyon: Mas mayad ro ehemplo ku sa tueomanon.

Gitanjali 26

Gitanjali 26

RabindranathTagore

Gin-inakeanon ni Melchor F. Cichon

December 19, 2015

Umabot imaw ag naglingkod sa kilid ko, pero owa ako makabugtaw. Isaea ratong pagtueoy nga katueogon, Ay, si kaeueooy nga ako!

Umabot imaw samtang malinong ro kagab-ihon; ginabuytan nana ra arpa, ag rang mga panamgo hay mga ugong sa anang melodiya.

Kanugon! Ham-at naduea rang kagab-ihon? Ay, ham-at indi ko permi makita ra anang uyahon nga may ginhawang nagahapeos sa katueogon ko?

Gitanjali 25

Gitanjali 25

RabindranathTagore

Gin-inakeanon ni Melchor F. Cichon

December 19, 2015

Sa gabii nga pagkagauy, sugti akong makatueog nga owa't kabudlay, ag ikarga eang kauglingon kimo.


Indi mo ako pagsugti nga piliton ko rang gaeupaypay nga espiritu hanungod sa manabang klase nga pagpreparar sa pagpadungog kimo.


Ikaw ro gapilo ku kurtina it gabii sa mga gauy nga mata it adlaw agod mag-eutaw eon man ro panaw-awon sa mas maalipaksing kasadya it pagmukeat.

Gitanjali 24

Gitanjali 24

ni Rabindranath Tagore

Gin-Inakeanon ni Melchor F. Cichon

December 19, 2015

Kon nagtunod eon ro adlaw, kon ro mga kapispisan owa eon gakaeanta, kon gaoy eon ro hangin, ihapeag eon dayon kakon ro takurong it kadueoeman, maski hatabuan mo eon ro kalibutan it kubrekama it pagtueog ag may pagmahae nga pagtakup ku mga nagadueoeongeay nga mga sinipadsipad it lutos sa salikaeum.

Halin sa biyahero, kon siin ra saku’t pagkaon hay owa’t sueod bag-o matapos ro paeanawon, kon siin ro eambong hay gision eon ag puno’t tapo-tapo, kon siin ro kabaskug hay maeuya eon gid, bue-a ring kahuya ag kaimoeon, ag ibalik ra anang kabuhi katuead it bueak sa idaeum it makandila nga gabii.

Gitanjali 23

Gitanjali 23

ni Rabindranath Tagore

Gin-Inakeanon ni Melchor F. Cichon
December 17, 2015

Napapangeayawan ka baea sa mabagyuhong gabii ngara sa imong pamanawon it gugma, amigo ko? Nagamueomueo ro eangit pareho sa tawo nga nadueaan it pag-eaum.

Owa ako’t tueog makarong gabii. Sa gihapon ag oman, ginbuksan ko rang pwertahan ag nagtan-aw sa guwa sa dueom, amigo ko!

Owa ako’t makita sa atubang ko. Gakangawa ako kon siin ring daean.

Siing madueom-dueom nga pangpang it itum-tintang suba, sa kilid it nagakulisong nga kagueangan, siing nananga-sangang kadaeuman it kalisdanan nga ginaagyang daean paagto kakon, amigo ko?

Gitanjali 22

Gitanjali 22

ni Rabindranath Tagore

Gin-Inakeanon ni Melchor F. Cichon

December 16, 2015.

Sa madaeum nga mga anino it maueanon nga Hulyo, nagpanaw ka nga may mga sekretong eak-ang, pareho’t kahipos it gabii, ginlikawan ro mga bantay.

Makarong adlaw, nagpiyong ro agahon, owa ginpamatian ro mga mapiliit nga mga tawag nga mga mabaskug nga hanging sidlangan, ag ro madamoe nga takurong hay ginhapeag sa perming bugtaw nga asul nga eangit.

Gin-euok it kakahuyan ro andang mga kanta, ag tanan nga pwertahan sa kada pamaeay hay sirado. Ikaw ro isaeahanon nga manugpanaw sa ginhalinan nga karsada. O, rang isaeahanon nga amigo, rang pinakamahae, ro trankahan kang baeay hay bukas –indi ka mag-agi pareho it panamgo.

Gitanjali 21

Gitanjali 21

ni Rabindranath Tagore

Gin-Inakeanon ni Melchor F. Cichon
December 16, 2015

Kinahangean ko nga ilunsar rang baroto. Nag-agi sa daeagsaan ro ginatamad nga mga inoras--nakanugonan kakon!

Natapos eon it tigtueobo ro anang pagbueoeak ag nagpaadyos. Ag makaron daea-daea ro mga eaya
nga owa't pueos nga mga bueak naghueat ako ag nagpahimunong.

Nagwinaeas ro mga humbak, ag sa baybayon sa mahandong nga daean, ro mga dueaw nga dahon hay nagwagayway ag nahueog.

Anong pagkaowa't sueod ring ginatueok! Owa mo baea nabatyagan ro gakurogkurog nga kaila nga nag-agi sa kaeangitan nga puno it mga kanta nga nagaeutaw halin sa pihak nga pangpang?

Gitanjali 20

Gitanjali 20

Rabindranath Tagore

Gin-Inakeanon ni Melchor F. Cichon
December 16, 2015

Sa adlaw nga nagbuskad ro lotus, kanugon, rang piniino hay nagataeang-taeang  ag owa ako kasayod. Owa’t sueod ro basket ag owa pa gihapon ginainato ro bueak.

Makaron eang ag oman sangka kalisud ro humapon kakon, ag bumangon ako sa panamgo ag nabatyagan ro matam-is nga paeatandaan ku sangka makangangawang kahumot sa hanging habagat.

Ro makabueoyog nga katam-is ngato ro nagpasakit nga may pagkahidlaw sa tagipusuon ko ag sa panan-aw ko nga raya ro paginhawa it tig-ilinit nga nagausoy ku anang pagkumpleto.

Owa ako kasayod kato nga napakaeapit man lang gali, nga akon ra, ag ro perpektong katam-is ngara hay nagbuskad sa kaidadaeman kang tagipusuon.

Gitanjali 19

Gitanjali 19
Ni Rabindranath Tagore
Gin-Inakeanon ni Melchor F. Cichon
December 15, 2015

Kon indi ka maghambae tigbon ko rang tagipusuon sa imong paghipos ag antuson ko ra. Indi ako maghueag ag mahueat it pareho it gabii sa bituong nagapueaw ag nagadungok sa pagpupursige.

Sigurado nga maabot ro agahon, maduea ro kadueom, ag mabubu ring limog sa bueawanon nga mga busay nga nagaeapos sa  eangit.

Ag mag-eupad ring mga kanta halin sa kada pugad it mga pispis; ag magbuskad nga mga bueak ro imong mga tunog sa tanan nga mga taeamnan nga mga bukid ko.

Gitanjali 18

Gitanjali 18
Ni Rabindranath Tagore
Gin-Inakeanon ni Melchor F. Cichon
December 15, 2015

Ginpadamoe it mga gaeum ro mga gaeum ag nagdueom. A, gugma, ham-at ginpabay-ang gahueat ako sa guwa sa may pwertahan nga gaisaeahanon?

 Sa mga masakong mga inoras it truadlaw nga ueobrahon hay kaibahan ko ro mga pumoeuyo, apang sa makarayang madueom mamingaw nga adlaw eang rang pag-eaum.

Kon indi mo ipakita ring uyahon, kon bilog nga aywan mo gid ako, indi ko masayran kon paano ko pabuhayon ro mga mahaba, maueanong oras ngara.

Samitan ko nga tan-awon ro napakaeayo nga kadueom it eangit, ag nagawarang rang tagipusuon nga nagakasubo sa nagataeang-taeang nga mahanayhay nga huyop it hangin.

Gitanjali 17

Gitanjali 17

Ni Rabindranath Tagore

Gin-Inakeanon ni Melchor F. Cichon

December 15, 2015

Mahueat eon lang ako sa gugma agod isurende ko rang eawas sa katapusan sa anang mga alima. Busa sobra eon gid nga naulihi ag saea ko ro makaruyon nga pagkalipat.

Nag-abot sanda nga may mga laye ag mga kodego agod kadenahan ako eagi-eagi; apang permi ko sanda nga nalikawan, bangod gahueat man lang ako sa gugma agod iampo rang eawas sa katapusan sa anang mga alima.

Ginbasoe ako it mga tawo ag gintawag ako nga owa't katuyuan. Owa ako magduhaduha sa kamatuuran ku andang pagbasoe.

Tapos eon ro mga adlaw it tinda ag tapos eon tanan ro mga ueobrahon para sa mga masaku. Ro mga nag-abot agod tawgon ako nga owa't kapuseanan hay nagpaeanaw nga mga maeain ra buot. Nagahueat man lang ako it gugma agod iampo ko rang eawas sa katapusan sa andang mga alima.

Gitanjali 16

Gitanjali 16
ni Rabindranath Tagore
Gin-Inakeanon ni Melchor F. Cichon.
December 14, 2015

May imbitasyon eon ako sa pagselebrar ku rayang kalibutan, ag bangod kara hay maswerte rang pangabuhi. Hakita eon kang mga mata ag nabatian eon kang mga dueonggan.

Kaibahan ko sa punsiyon ngara ro nagpatunog it instrumento ko, ag haobra ko tanan nga maobra ko.

Pangutana ko, nag-abot eon gid man baea ro oras sa katapusan agod magsueod ako ag makita ro inyong uyahon ag ihaead kinyo rang mahipos nga pagsaludo.

Gitanjali 15

Gitanjali 15

ni Rabindranath Tagore

Gin-Inakeanon ni Melchor F. Cichon.

December 14, 2015

Iya ako agod magkanta it tatlong kanta. Sa raya nga bulwagan mo may hueot nga malingkuran ko.

Sa kalibutan mo owa ako’t obra; rang owa’t pueos nga kabuhi hay pwede manlang eumusot sa tuno nga owa’t kapuslanan.

Kon umabot ro oras para sa malinong nga pagsimba sa madueom nga templo it tunganggabii, sugoa ako, akong diyos, agod magtindog sa atubang mo agod magkanta.

Kon agahon nga maitono ro bueawanon nga arpa, padunggan mo ako agod mag-atubang kimo.