Manggaranon Kita, Di Bala?

Manggaranon Kita, Di Bala?
Ni Melchor F. Cichon
August 10, 2011

Mangkaranon kita, di bala?
Pamangkuta si Heneral.
Isang milyon lang man ang pabalon sa iya
Sang magretiro siya. Di bala?
Pamangkuta ang PAGCOR.
Isang bilyon lang man ang gingastos nila
Para sa pangkape-kape nila. Di bala?
Pamangkuta ang GSIS sang baklon nila
Ang mga obra maestra ni Juan Luna.
Milyon-milyon lang man to. Di bala?
Kag kun pamangkuton mo pa
Ang mga big boss sang mga pulis
Masarangan gid naton magbakal
Sang mga helicopter nga nagamit na sang mga herodes
Pero ang bayad pangbag-o pa. Di bala?

Manggaranon kita, di bala?
Indi mo lang paglantawon
Ang mga suldato sa patag-awayan
Nga nagakamang sa mga lunang
Kag nagasuksok sang busluton nga mga bota.
Kag mga bala nga nagabackfire kon palukpon nila.
Pasiplatan mo lang ang mga Ati kag ang mga Badjao
Nga nagahigda sa mga binit-kalsada.
O ang nagalugod-lugod nga mga tigulang nga nagapila
Sa opisina sang GSIS agod makuha ang mga pensiyon nila.
Bangud manggaranon kita,
Waay na sang hold-aper, carnaper, kidnaper, pickpoketer
Waay naman sang tonggresman
Sa atong banwa, di bala?

Sugiri kami, banwa, sugiri kami.
Manggaranon kita, di bala?

Kuha mo?