poems, Sampaguita

Sampaguita

ni Melcichon

October 19, 2011

Ikaw, Sampaguita, ro ugsad nga buean

Nga gatao it kasiga

Sa madueom ko

Nga daean.

Matuod

Nga kon amat

Nagakaduea-duea ka

Bangod sa naga-agi-agi nga gae-um

Pero ring kasiga

Nagapadayon nga nagatuytoy

Sa mga paminsaron ko

Eabi eon gid

Kon magapaeuka it butong ro hangin,

Kon owa't untat ro pagbinunok it uean

Sa kabuhi ko.

Ikaw eon lang, Sampaguita,

Ro nagatao kakon it kainit,

Kainit sa tagipusuon ko

Agod ako makapanumdom

Nga may kabuhi

Nga may kapus-eanan

Pa rang pagkatawo.

Ag kon matunod

Gid man rang adlaw

Hueogan mo eang rang paeahuwayan

Ku imong owa't pag-eaya nga bueak,

Owa't pagkaduea king kahumot,

Magbutlak it oman rang adlaw,

Magbutlak it oman rang adlaw

Maski sa katueondan.