Eubong

Ro Pag-eubong
Ni Melcichon
October 31, 2012

Pag-abot ku bangkay halin sa hospital,
Ginpaligsan it albularyo ag dayon ginbanyusan it eana
Nga halin sa bugtong nga niyog.
Ginsuksukan it barong tagalog ag itom nga saewae.
Ro bag-o nga eaba nga puti nga medyas
Ro dayon nga ginpasuksuk kay Tay Jose.
Nag-aeabot ro mga bisita—mga onga, mga magueang.
Mga tawo nga mga kilaea nana.
Nga tagnagapaeaea pa imaw sa kanser
Hay owa gid it may nagduaw.
Makaron abu eon sanda.
Ro iba hay nagamueawmueaw ro andang mga mata.
Ro iba hay tabla ro andang mga mata.
Sa besperas it eubong, puno ro baeay
Ni Tatay Jose.
Pagpangadi, mga napueo eang nga mga magueang nga baye
Ro sa sueod it baeay.
Ro kaabuan sa guwa
Gatumbo, kamadyong, galakinine, gatung-it.
Isaea sa miyembro it tagbaeay hay busy
Sa pagpalibot it mga bisket, ag kape
Sa mga nagdueo-aw kuno.
Tanan nga limos hay maidid gid nga ginpanglista
Ku kamagueangan nga baye—sin-o ag pila ro amot.
Kon pila so amot ku sangka tawo,
Imaw man ro iga-amot sa ulihi kon may namatyan man ro andang pamilya.
Pagpanog it bangkay, tanan ro mga onga ni Tay Jose
Hay ginpasuhot sa idaeom it kabaong—owa ako kasayod kon ham-an.
Ag bag-o ginbutang ro kabaong sa puninarya
Ginsigurado nga ro ueohan hay una nga ginsueod.
Paris kon tag imaw pa hay nagatindog.
Indi magsueang ro pare sa krosing
Ay owa pa’t kasiguruhan nga may dugang nga bayad
Sa anang misa requiem.
Bag-o ginsueod sa pantiyon, ginbuksan anay ro kabaong
Para sa ulihi nga pagtan-aw ku anang mga igbata ag kakilaea.
Bag-o gin-eubong,
Ginhupead ni Nay Soriang ro panyo nga puti
Sa ibabaw it kabaong ku anang bana.
"Adios, Jose", hambae nana.