Ham-at Mag-uyang Ka Gid King Euha?

Ham-at Mag-uyang Ka Gid King Euha?
ni Melchor F. Cichon.
Nov. 12, 2017

Ham-at mag-uyang ka gid king euha
Kon may natumba sa pagtokhang?
Bukon abi't para man don sa kamaeayran it tanan?
Bukon abi't ginpangwarningan eon don sanda tanan
Nga untaton eon ro pagbinaligya o pagginamit it druga?
Bukon abi't una pa sanda nagpaeupok ku andang mga baril
Sa mga raiding team bag-o sanda pinatumba?
Salf defense man lang kuno ro andang ginhimo.
Ugaling maski nakabaklid eon ro andang mga alima sa andang likod
Samtang nagaeuhod hay binaril man gihapon ro andang dughan.
O basi kanugon ro premyo kon owa sanda't matiklo
Sa andang misyon? Kanukon man ron!
Pabay-e ro mga nagapangwakae nga mga puti
Sa mga paglampaso ku atong tawhanon nga kinamatarong.
Mas sobra pa gid ngani kuno ro andang gin-obra sa Vietnam,
Sa Syria, sa Iran. Bomba gid ngani ro andang gingamit
Agod mag-euhod tanan ro nagasukoe sa andang handum.
Ham-at mag-uyang ka gid king euha
Kon magsaeampukan ro atong mga senador sa kongreso
Samtang sanda hay nagakaealhitan it mga eutay?
Bukon abi't ginpangbutang man naton don sanda
Bangod sa andang pangaku nga batakon kita tanan
Sa kaimueon, sa kalisdanan?
A, siguro haeubong eon nanda
Ro andang pasalig katon tanan.
Ham-at magpin-ot gid ring paginhawa
Sa mga moro-moro ku atong mga haeangdon
Sa Malacanyang, sa kongreso
Total tanan sanda hay mga Filipino man.
Bukon abi't hambae sa bibliya
Higugmaon mo ring isigkatawo
Maski ro atong dungog hay ginaeapak-eapakan eon nanda?
Maski ro kaban ku atong banwa hay ginakinaw-it nanda?