Ginsueat it oman
ni Melchor F. Cichon
June 27, 2020
May mag-asawang Albert ag Norma. Sambilog ro andang unga, si Ambeth. Kaibahan nanda sa andang baeay ro Tatay ni Albert nga si Lolo Empoy. Bangod 75 eon ra edad hay imaw eon lang ro gaalila kay Ambeth kon may opisina sanday Albert ag Norma.
Sa ulihi, nagmasakit si Lolo Emboy ag ro daywa nanang alima hay gakurog. Ro maeain hay permi nagakahueog ag nagakabuka ro mga pinggan nga anang ginabuytan. Bangod kara nagdesider ro mag-asawa nga taw-an si Lolo Empoy it pinggan nga kahoy agod indi eon madugangan ro mga nagkaeabuka nga pinggan.
Hadiparahan ra ni Ambeth sa gin-obra ka anang mga ginikanan kay Lolo na.
Domingo it hapon pagkatapos it andang pag-ilabas. Nagpanaog si Ambeth sa andang uto nga may daea nga martilyo ag tigib. Nag-usoy imaw it sangka tabla ag gin-umpisahan nana ro anang ginplano.
Habatian ka Tatay ni Ambeth ro pagpinukpok ni Ambeth, busa nagpaog imaw agod tan-awon ro ginaobra ni Ambeth.
"Ano ro ginahimo mo, Nonoy?" pangutana ka Tatay.
"Gahimo ako't pinggan agod kon mag-ugoy-ugoy eon man kamo ni Nanay hay raya ro inyong gamiton nga plato agod indi magkaeabuka ro atong mga pinggan."
Narealisar ni Albert ra ginhimo sa anang Tatay.
Halin kato hay ginbag-o ro andang pagtratar kay Lolo Empoy.
No comments:
Post a Comment