Pyesta Sa Amon nga Barangay

 

Pyesta Sa Amon nga Barangay
Melchor F. Cichon
Oct. 1, 2018

Disperas ku among pyesta,
Mabatian ro gainiwik nga mga baboy;
Libon-libon ro mga baeahibo it mga manok
Ro ginahaboy sa mga puno’t saging.
Haeos mabungoe ka sa tunog
It sound system sa pabilyon
Agod masayran it mga daeaga ag miron
Nga may bayle ag may basket
Nga ginasubasta.
Aga-aga pa sa kaadlawan it piyesta
Mabatian eon ro galibot nga banda.
Ginatos nga tawo ro gatinikang
Paagto sa ermita agod magsimba.
Ginatos man ro gatinikang nga tawo
Paagto sa bueangan.
Ag samtang gasermon ro pare,
Gasininggit man ro mga tahor it "Sa puea, sa puti."
Pagkatapos it misa,
Gapaeupok it pwetis.
Ginaagawan eon dayon it mga unga
Ra patpat kara kon mahueog.
Bilog nga adlaw, owa’t untat
Ro pagkinaon, ro pag-ininom it tuba o tanduay.
Owa’t untat man ro pagsininggit it mga tawo sa bueangan.
Pagkahapon,
May mga hinampang sa may karsada:
Anilyo, palo-sebo, tumbo.
May amateur contest sa pabilyon.
Pagkatos it piyesta,
Gapanghayhay ro mga nanay
Ay ibis o dayok eon lang ro suea
Ag kon paano mabayaran ro mga utang.