Indi Eon Magtangis
***Melchor F. Cichon
Jan 17, 2021
Indi eon magtangis, Parayaw.
Mabalik gid ako sa euyo mo.
Indi eon siguro abutan it sang dag-on
Mapanas eon si Covid-19 sa kalibutan.
Ag sa pagkaduea na
Maeutaw ako dayon.
Ro masakit eang hay
Igto pa kita mabakae it baksin sa China
Kon siin maghalin ro pandemya ngara.
Kanugon, milyon-milyong piso ro ginatagana ku atong gobyerno
Agod makabakae kita ku baksin ngara.
Kunta magamit pa naton ro kwarta ngaron
Sa pagpatindog it eskuylahan
O ospital.
Makabulig pa kunta ron
Sa pag-obra it tulay halin sa Iloilo paagto't Guimaras.
Owa pa ngani naton mabayran ro atong utang sa World Bank
Hara eon man ro bag-o natong utang.
Ahay....
Mayad siguro hay igaid sa baeay it tagasaw
Ro nag-obra ku Covid-19 ngara
Agod masayran na ro hapdi
Ku anang ginpanamgong negosyo.
Parayaw, indi eon magtangis
Mabalik gid ako sa euyo mo.
Sa pagtunod it adlaw
May ugsad man nga masub-eak.
No comments:
Post a Comment