Luwa sa Mga Babaye
Ni Melchor F. Cichon
Balita! Balita!
May fetus nga hakita
Sa mahalimunon nga daean
Maeapit sa eskuylahan.
***
Hipos anay, hipos anay
Ay ro mga kandidata nagamartsa.
Andang besti nagasidlak, nagasiga
Bangud ro andang anwang ginpanumba.
***
Igto sa amon nga baeay
May daywang bayeng paeahikay.
Pag-abot ni Nanay,
Nagmaeaea ra andang eaway.
***
Igto sa Kalibo
May daeaga nga matambok;
Kon imaw ngani mag-eag-ok,
Nagakaeamatay ro namok.
***
Inday kon batunon mo eang ako,
Indi mo gid pag-angkiton ring siko;
Kon mag-usoy ka’t makabitan,
Mausoy man ako ku akong masab-itan.
***
Inday, kon ako imo nga batunon,
Owa ka gid it ibang handumon,
Ay bisan ro buean ag ro mga bituon,
Sa kama mo akon nga daehon.
***
Inday, magpaeapit ka riya,
Kon indi ka ngani matumba
Sa ginsakyan mo nga bala,
Pakaslan gid dayon kita.
***
Kon ako mangasawa,
Pilion ko gid ro gwapa
Para kon maubusan eon ngani ako’t kwarta
Sa Japan ko imaw ipasalta.
***
Kon amat indi ako makatueog
Sa pagpinanumdom
Kon-ham-at may mga eaeaki
Nga daw magkaumangon bangud eang sa mga babaye.
***
Kon gusto mo gid man ako
Nga mangin nobyo mo;
Basyahan mo’t yelo ro adlaw,
Agod indi ra matunaw.
***
Mabahoe nga balita!
Si Lola naka-miniskirt eot-a,
May cellphone pa
Nga nagakabit-kabit sa hawak na!
***
Maski matunaw sa North Pole ro yelo
O maupod ro kaeayo sa impyerno;
Owa ra it kaso, basta ikaw
Iya eang kahulid ko.
***
Ngisi ag ngisi
Si Inday sa Library;
Gali may habunit nga eaki
Sa paggamit it internet.
***
Ro baeay ko sa Boracay
Ra poste ginhimo sa sigay.
Kon sumaka si Inday
Nagakapusa ra tuway.
***
Sa amon nga banwa
May sanglibo nga daeaga.
Ugaling abu gid rang kangawa
Ay kon gabii eang sanda kon mag-obra.
***
Sa amon nga baryo
May lola nga matambok;
Kon binukbok indi makakadlot,
Pero ko sinanlag nga mais, nagaeagumok.
***
Sa amon nga opisina
May baeo nga senyora;
Adlaw-adlaw imaw nagabongga,
Pero kon kinsina, ro gasukot kana gapila.
***
Sa amon opisina
May ulay nga daeaga;
Kon oras it trabaho
Sa bubungan gatapik ra painu-ino.
***
Sa primero nga pagkakita ko kimo
Rang tagipusuon nag-eukso-eukso;
Pagkakita ko kimo nga owa’t make-up,
Gulpi ako nga nadismayo.
***
Sa tiyan it dragon
Ro mga Pinay mahipuson.
Owa gasinggit maskin kuroton
Ay ra andang tiyan gutom.
***
Si Inday owa gid it kaeo-oy
Kay Nonoy sa Kuwait nagapainit.
Kon imaw ngani eamigon,
Masuhot sa haboe ni Ambeth.
**Melchor F. Cichon
June 16, 2016
No comments:
Post a Comment