Pagkatapos

 

Pagkatapos

Melchor F. Cichon

March 14, 2017

 

Pagkatapos

Natong baeayon

Ro atong mga handum,

Naduea ka dayon.

Hambae mo,

Tanan nga bagyo,

Tanan nga baha,

Bisan ro nagatigiti nga silak

Maeampasan naton ra

Basta kita hay may pag-unong sa isaea't-isaea.

Pero handumanan eon lang tanan ro habilin kara.

Kon nagkueang gid man ako, Mahae,

Maeuhod ako sa atubang mo--

Pasensiyaha gid ako.

Pero gapangadi gid ako

Nga magbalik ka sa euyo ko.

Pero kon hinali

Nga gusto mo pa nga baeayon naton it uman

Ratong mga naguba natong baeayan,

Bukas rang tagipusuon

Bangud kita eang gid lang

Ro makabaeay kara't uman.

Kita eon gid lang

Ro makabaeay kara't uman.