Poems for My Nanay

 

Poems for my Nanay

Melchor F. Cichon

 

Inay

Inay, matuod nga may diploma eon ako

Peru ibis ag dayok man pirmi rang suea.

Pumanaw ako nga owa mag-eaong

Bangud nga indi ko matiis nga makita kang

Gatangis kakon.

Inay, kon manggaranon eang ako,

Eukaton ko ro atong eanas,

Patindugan kita’t bungalow,

Bakean kita’t kolord TV ag Hi-Fi.

Ugaling, Inay

Hasta makaron

Istambay man ako gihapon

Ay owa kuno ako’t diputadong maninoy.

 

NANAY SORIANG

 

Samtang nagakaeanta ro mga agagangis

Sa palibot it andang baeay,

Ginatinueok ni Nanay Soriang ro nagakaupos

Nga tatlong kandila sa altar

Nga ginapalibutan it eapoy eon nga

Mga rosas ag orkid.

Nagyuhum imaw pagkadumdom nana

Ku ratong mga mahapdi ag matam-is

Nga mga oras kon siin

Imaw kato hay isaea pa nga duyan, haboe ag hagdan

Ku ap-at nana nga mga onga.

Apang makaron...

Kon hin-uno pa nana kinahangean

Ro mga hakos nanda...

Imaw eon lang isaea

Ro nagatueok sa nagakaupos nga mga kandila

Bangud ro mga onga nana kuno

Hay sobra gid kuno nga kasaku

Sa pag-eagas it kwarta

Sa tindahan it Baclaran,

Sa opisina it Makati,

Sa night club sa Ermita

Ag sa baeay it Intsik sa Hong Kong.

 

MOTHER

 

Mother

Is a lighted candle

And a winnow

Any time, any place

For a child

No matter what the price is.

 

HAM-AT MADUEOM RO GABII, INAY?

 

Inay, ham-at madueom ro gabii?

May buean, Toto, ugaling may galipud nga gae-um.

Inay, ham-at madueom ro gabii?

May bombilya ro mga poste't Akelco,

Ugaling may brown-out.

Inay, ham-at madueom ro gabii?

Ginsinindihan ko ro atong kingke,

Ugaling ginapinaeong it hangin.

Inay, ham-at madueom ro gabii?

Toto, matueog ka eon lang

Ay basi hin-aga temprano pa

Magsilak ro adlaw.

Indi, 'Nay ah!

Sindihan ko't uman ro atong kingke.