Gitanjali 23

Gitanjali 23

ni Rabindranath Tagore

Gin-Inakeanon ni Melchor F. Cichon
December 17, 2015

Napapangeayawan ka baea sa mabagyuhong gabii ngara sa imong pamanawon it gugma, amigo ko? Nagamueomueo ro eangit pareho sa tawo nga nadueaan it pag-eaum.

Owa ako’t tueog makarong gabii. Sa gihapon ag oman, ginbuksan ko rang pwertahan ag nagtan-aw sa guwa sa dueom, amigo ko!

Owa ako’t makita sa atubang ko. Gakangawa ako kon siin ring daean.

Siing madueom-dueom nga pangpang it itum-tintang suba, sa kilid it nagakulisong nga kagueangan, siing nananga-sangang kadaeuman it kalisdanan nga ginaagyang daean paagto kakon, amigo ko?

Gitanjali 22

Gitanjali 22

ni Rabindranath Tagore

Gin-Inakeanon ni Melchor F. Cichon

December 16, 2015.

Sa madaeum nga mga anino it maueanon nga Hulyo, nagpanaw ka nga may mga sekretong eak-ang, pareho’t kahipos it gabii, ginlikawan ro mga bantay.

Makarong adlaw, nagpiyong ro agahon, owa ginpamatian ro mga mapiliit nga mga tawag nga mga mabaskug nga hanging sidlangan, ag ro madamoe nga takurong hay ginhapeag sa perming bugtaw nga asul nga eangit.

Gin-euok it kakahuyan ro andang mga kanta, ag tanan nga pwertahan sa kada pamaeay hay sirado. Ikaw ro isaeahanon nga manugpanaw sa ginhalinan nga karsada. O, rang isaeahanon nga amigo, rang pinakamahae, ro trankahan kang baeay hay bukas –indi ka mag-agi pareho it panamgo.

Gitanjali 21

Gitanjali 21

ni Rabindranath Tagore

Gin-Inakeanon ni Melchor F. Cichon
December 16, 2015

Kinahangean ko nga ilunsar rang baroto. Nag-agi sa daeagsaan ro ginatamad nga mga inoras--nakanugonan kakon!

Natapos eon it tigtueobo ro anang pagbueoeak ag nagpaadyos. Ag makaron daea-daea ro mga eaya
nga owa't pueos nga mga bueak naghueat ako ag nagpahimunong.

Nagwinaeas ro mga humbak, ag sa baybayon sa mahandong nga daean, ro mga dueaw nga dahon hay nagwagayway ag nahueog.

Anong pagkaowa't sueod ring ginatueok! Owa mo baea nabatyagan ro gakurogkurog nga kaila nga nag-agi sa kaeangitan nga puno it mga kanta nga nagaeutaw halin sa pihak nga pangpang?

Gitanjali 20

Gitanjali 20

Rabindranath Tagore

Gin-Inakeanon ni Melchor F. Cichon
December 16, 2015

Sa adlaw nga nagbuskad ro lotus, kanugon, rang piniino hay nagataeang-taeang  ag owa ako kasayod. Owa’t sueod ro basket ag owa pa gihapon ginainato ro bueak.

Makaron eang ag oman sangka kalisud ro humapon kakon, ag bumangon ako sa panamgo ag nabatyagan ro matam-is nga paeatandaan ku sangka makangangawang kahumot sa hanging habagat.

Ro makabueoyog nga katam-is ngato ro nagpasakit nga may pagkahidlaw sa tagipusuon ko ag sa panan-aw ko nga raya ro paginhawa it tig-ilinit nga nagausoy ku anang pagkumpleto.

Owa ako kasayod kato nga napakaeapit man lang gali, nga akon ra, ag ro perpektong katam-is ngara hay nagbuskad sa kaidadaeman kang tagipusuon.

Gitanjali 19

Gitanjali 19
Ni Rabindranath Tagore
Gin-Inakeanon ni Melchor F. Cichon
December 15, 2015

Kon indi ka maghambae tigbon ko rang tagipusuon sa imong paghipos ag antuson ko ra. Indi ako maghueag ag mahueat it pareho it gabii sa bituong nagapueaw ag nagadungok sa pagpupursige.

Sigurado nga maabot ro agahon, maduea ro kadueom, ag mabubu ring limog sa bueawanon nga mga busay nga nagaeapos sa  eangit.

Ag mag-eupad ring mga kanta halin sa kada pugad it mga pispis; ag magbuskad nga mga bueak ro imong mga tunog sa tanan nga mga taeamnan nga mga bukid ko.

Gitanjali 18

Gitanjali 18
Ni Rabindranath Tagore
Gin-Inakeanon ni Melchor F. Cichon
December 15, 2015

Ginpadamoe it mga gaeum ro mga gaeum ag nagdueom. A, gugma, ham-at ginpabay-ang gahueat ako sa guwa sa may pwertahan nga gaisaeahanon?

 Sa mga masakong mga inoras it truadlaw nga ueobrahon hay kaibahan ko ro mga pumoeuyo, apang sa makarayang madueom mamingaw nga adlaw eang rang pag-eaum.

Kon indi mo ipakita ring uyahon, kon bilog nga aywan mo gid ako, indi ko masayran kon paano ko pabuhayon ro mga mahaba, maueanong oras ngara.

Samitan ko nga tan-awon ro napakaeayo nga kadueom it eangit, ag nagawarang rang tagipusuon nga nagakasubo sa nagataeang-taeang nga mahanayhay nga huyop it hangin.

Gitanjali 17

Gitanjali 17

Ni Rabindranath Tagore

Gin-Inakeanon ni Melchor F. Cichon

December 15, 2015

Mahueat eon lang ako sa gugma agod isurende ko rang eawas sa katapusan sa anang mga alima. Busa sobra eon gid nga naulihi ag saea ko ro makaruyon nga pagkalipat.

Nag-abot sanda nga may mga laye ag mga kodego agod kadenahan ako eagi-eagi; apang permi ko sanda nga nalikawan, bangod gahueat man lang ako sa gugma agod iampo rang eawas sa katapusan sa anang mga alima.

Ginbasoe ako it mga tawo ag gintawag ako nga owa't katuyuan. Owa ako magduhaduha sa kamatuuran ku andang pagbasoe.

Tapos eon ro mga adlaw it tinda ag tapos eon tanan ro mga ueobrahon para sa mga masaku. Ro mga nag-abot agod tawgon ako nga owa't kapuseanan hay nagpaeanaw nga mga maeain ra buot. Nagahueat man lang ako it gugma agod iampo ko rang eawas sa katapusan sa andang mga alima.

Gitanjali 16

Gitanjali 16
ni Rabindranath Tagore
Gin-Inakeanon ni Melchor F. Cichon.
December 14, 2015

May imbitasyon eon ako sa pagselebrar ku rayang kalibutan, ag bangod kara hay maswerte rang pangabuhi. Hakita eon kang mga mata ag nabatian eon kang mga dueonggan.

Kaibahan ko sa punsiyon ngara ro nagpatunog it instrumento ko, ag haobra ko tanan nga maobra ko.

Pangutana ko, nag-abot eon gid man baea ro oras sa katapusan agod magsueod ako ag makita ro inyong uyahon ag ihaead kinyo rang mahipos nga pagsaludo.

Gitanjali 15

Gitanjali 15

ni Rabindranath Tagore

Gin-Inakeanon ni Melchor F. Cichon.

December 14, 2015

Iya ako agod magkanta it tatlong kanta. Sa raya nga bulwagan mo may hueot nga malingkuran ko.

Sa kalibutan mo owa ako’t obra; rang owa’t pueos nga kabuhi hay pwede manlang eumusot sa tuno nga owa’t kapuslanan.

Kon umabot ro oras para sa malinong nga pagsimba sa madueom nga templo it tunganggabii, sugoa ako, akong diyos, agod magtindog sa atubang mo agod magkanta.

Kon agahon nga maitono ro bueawanon nga arpa, padunggan mo ako agod mag-atubang kimo.

Gitanjali 14

Gitanjali 14

Ni Rabindranath Tagore

Gin-Inakeanon ni Melchor F. Cichon

December 14, 2015

Dagaya rang handum ag makaeueuoy rang tangis, apang permi mo akong ginatabangan sa makusog nga pagbalibad; ag rayang pwersadong pagkaeuoy hay nakilkil sa bilog ko nga kaeawasan.

Adlaw-adlaw hay ginaobra mo ako nga taeahuron sa mga simple, haeangdong regalo nga ginatao mo nga owa ginapangayo—rayang eangit ag ro kasiga, rayang eawas and ro kabuhi ag ro piniino—ginaeuwas  ako sa mga peligro sa sobra nga kalisud.

May mga oras nga ginatamad ako nga maghueat ag kon amat mabugtaw ako ag magdalidali sa pag-usoy kang handum; apang mapintas mong ginatago ring eawas kakon.

Adlaw-adlaw ginahimo mo ako nga taeahuron sa imong hugot nga pagbaton ag ginasalbar mo ako sa mga peligro it mga maeuya, nga owa’t kasiguruhan nga handum.

Gitanjali 13

Gitanjali 13

Ni Rabindranath Tagore

Gin-Inakeanon ni Melchor F. Cichon

December 14, 2015

Ro kanta nga gin-agtunan ko agod kantahon ko hay owa pa gihapon hakanta hasta makaron.

Naubos eon rang mga adlaw sa pagbinutang ag pagbinadbad kang kwerdas ku ang instrumento.

Owa pa gid mag-abot rang oras, ro mga tinaga hay owa pa gid maplastar; may una eang nga kalisod sa paghandum sa akon nga tagipusuon.

Ro bueak hay owa pa magbuskad; ro hangin eang ro gapanghayhay.

Owa ko pa hikita ra uyahon, ukon habatian ko ra limog; habatian ko eang ra anang mahinay nga eapak sa karsada sa atubang kang baeay.

Nagtaliwan ro bilog nga adlaw sa paglatag sa saeog ku anang lingkuran; apang owa masindihi ro kingke ag indi ko imaw makangay sa baeay ko.

Gakabuhi ako sa pag-eaum nga magkita kami; apang indi pa matabo ro pagkililita.

Jerel Ituriaga Oquendo, Calendar Girl 2016

Mila dela Rosa, Calendar Girl, 2016

Eliza Jonah Prado

Jinky dela Pena

Gakurog Man Baea

gakurog man baea
ro mga daho't Narra
kon maghuyang-huyang ro Sampaguita?
***Melchor F. Cichon
Dec 10, 2015

Gitanjali 12

Gitanjali 12

ni Rabindranath Tagore

Gin-Inakeanon ni Melchor F. Cichon

December 10, 2015

Ro oras kang pagpanaw hay mahaba ag ro paagi hay mahaba.

Gumuwa ako sakay sa chariot sa primero nga siga it kahayag, ag sinunod ko rang pagpanaw paagi sa kagueangan it mga kalibutan, gin-aywan rang eapak sa mga kabituunan ag planeta.

Ro pinakamaeayo nga aeagyan ro pinakamaeapit kimo, ag ro pagtuon ngaron ro pinakamasalimuot nga nagtapos sa pinakamamueo nga tono.

Sa katapusan, agod maabot ro pinakasueod nga alter, kinahangean nga magtoktok sa kada dumoeuong nga pwertahan agod masayran ra kaugalingon, ag kinahangean nga magwarang sa tanan nga kalibutan.   

Naglibot kon siin-siin rang mata bag-o ko ginpiyong ra ag maghambae “Iya ka!”

Ro pangutana ag ro singgit “A, siin?” hay natunaw sa mga euha it sanglibong busay ag hinumbak ro kalibutan it baha sa pagsalig nga “Hara ako!”

Gitanjali 11

Gitanjali 11
Rabindranath Tagore
Gin-Inakeanon ni Melchor F. Cichon
December 7, 2015

Aywan mo rayang sonata ag pagkanta

Gitanjali 9

Gitanjali 9
Rabindranath Tagore
Gin-Inakeanon ni Melchor F. Cichon
December 6, 2015

 Hay si Tanga, nagapamilit bangod ra eawas hay sa anang abaga! Hay si Pobre, nagapakalimos sa atubang ku ana mismong pwertahan!

Aywe tanan ring bagahe sa alima ku nagadaea it tanan, ag indi maski kan-o magbalikid nga may pagnuoe.

Ro kalisdanan mo hay maputoe dayon sa kahayag nga halin sa kingke nga gintabing ku anang ginhawa. Bukon ra it sagrado—indi pagbatunon ro regalo nga halin sa mahigku ngarang alima. Batunon eang ro regalo nga halin sa sagrado nga paghigugma.

Gitanjali 10

Gitanjali 10
Rabindranath Tagore
Gin-Inakeanon ni Melchor F. Cichon
December 7, 2015

Hara ro bangkito kon siin mo ipahuway ring mga siki kaibahan ku mga pinakaimoe, ro pinakamanubo, ag ro mga nagtaeang.

 Kon samitan ko nga magdungok kimo, rang pagduko indi gid makatungkad sa ikadadaeuman kon siin ring mga siki kapahuway kaibahan ku mga pinakaimoe, pinakamanubo, ag sa mga nagtaeang.

Indi gid makakita rang tagipusuon king daean kon siin ka gaimaw sa mga pinakaimoe, sa mga pinakanubo, ag sa mga nagtaeang.

Gitanjali 8

Gitanjali 8
Rabindranath Tagore
Gin-Inakeanon ni Melchor F. Cichon
Dec 3, 2015

Rang unga nga ginpadayawan it mga besti nga pang prensipe ag mga kulintas nga puno it mga alahas hay ginadueman it kasadyahan sa anang paghampang. Ginapunggan imaw ku anang eambong sa kada hueag.

Sa kahadlok nga basi gisgisan ra, o basi mabahiran it tapo-tapo, nagaeagiw imaw sa kalibutan ag nahadlok maski maghueag.

Inay, owa't pueos ro imong pagpaambong kana kon gapaeagiw kara ro unga sa nakapabaskug nga tapo-tapo it eugta, kon ginapanakaw ra ro deretso it unga nga magsueod sa haeangdong perya it pangtanang kabuhing pangtawo.

Gitanjali 7

Gitanjali 7
Ni Rabindranath Tagore
Gin-Inakeanon ni Melchor F. Cichon
Dec 2, 2015

Ginhugas ro mga puni sa kanta ko. Owa eon man ra it bugae nga putos ag puni. Abang sa atong pag-isaeahanon ro mga ornamento; nagadaea ra katon it espasyo; ginaeunod it mga eagting kara ro imong mga hutik.

Ro akon nga kapalaluan it manugbaealaybay hay namamatay sa kahuy-anan sa atubadngan king mata. O, tagatugang manugbinaeaybay, naglingkod ako sa sikihan mo. Ginahingyo ko eang nga mangin simple ag tadlong rang pangabuhi, pareho it sangka plawta it pasyok agod imong tigbon sa musika.

Gitanjali 6

Gitanjali 6
Rabindranath Tagore
Gin-inakeanon ni Melchor F. Cichon.
December 1, 2015

Kakalsohan ag daehon rayang maisot nga bueak. Dasiga!  Nakuebaan ako basi maeuoy ra ag mahueog sa tapo-tapo.

Posible nga owa ra it lugar sa kulintas mo nga bueak, apang taw-an mo ra it kadungganan nga sangka masakit nga pikpik halin sa alima mo ag pupulin ra. Nakuebaan ako nga tapos eon ro adlaw ag tapos eon man ro oras it paghaead bag-o ko mataeupangdan ra.

Apang bukon it madaeum ro kolor kara ag mapus-aw ro kahumot, gamiton rayang bueak agod maserbihan ka ag kakalsohan ra samtang may oras pa.

Gitanjali 4

Gitanjali 4
Rabindranath Tagore
Gin_inakeanon ni Melchor F. Cichon.
Nov 30, 2015

Kabuhi kang kabuhi, tinguhaon kong perming mabaskug rang eawas bangod hasayran ko nga tanan rang unod hay kabuhi nga nabatyagan mo.

Permi ko nga ginausuyan it paagi nga bue-on ro bukon it matuod sa akong piniino bangod hasayran ko nga ikaw ro kamatuoran nga nagsindi it kahayag it rason sa panumduman ko.

Permi ko nga himuan it paagi agod mahaboy paeayo ro tanan nga mga maeain sa tagipusuon ko ag amligan ro paghigugma ko nga nagabuskad bangod hasayran ko nga nakasuksok sa kaibuturan it altar kang tagipusuon.

Ag obligasyon ko nga ipaabot ka sa tanan ko nga hueag, bangod hasayran ko nga gahum mo ro nagatao kakon it kabaskug agod makahueag ako.

Gitanjali 3

Gitanjali 3
ni Rabindranath Tagore
Gin-Inakeanon ni Melchor F. Cichon
Nov. 28, 2015

Owa ako kasayod kon paano ka magkanta, tagapagtuga ko! Owa't katapusan akong gapamati sa mahipos nga pagdayaw.

Nagasiga sa kalibutan ro kasanag ku imong musika. Gaagi sa kaeangitan ro kabuhi ku imong musika. Gaeapus sa tanan nga matig-a nga nagabara ro sagrado nga busay king musika ag sige ra pagsinueog.

 Nagahandum rang tagipusuon nga magsunod sa kanta mo, ugaling napaslawan sa pag-usoy king limog. Nakahambae ako, ugaling indi makaguwa rang bisaea agod mahimo nga kanta, ag nagatangis ako nga may pagkakibot. Ay, binihag mo rang tagipusuon sa owa't katapusan nga lambat king musika, tagapagtuga ko!

Gitangali 2

Gitangali 2
Kon hambaean mo ako nga magkanta, ingko mabuka sa bugae rang tagipusuon; ag ginatueok ko gid ring uyahon, ag napaeuha ako.

Tanan nga kapintas ag masungit sa kabuhi ko nagakatunaw sa sangka matam-is nga limog--ag rang pagtuo ko hay natutubuan it pakpak it sangka malipayon nga pispis sa pagtabok it dagat.

Hasayran ko nga nalipay ka gid sa pagkanta ko. Hasayran ko nga bilang manugkanta eang ako nagapaeapit sa atubang mo.

Gapaeapit ako sa paagi it sangka maeapad nga pakpak it kanta ko sa imong aeagyan nga owa ka nga owa ko gid ginhangop nga abuton.

Hilong sa kasadyahan it pagkanta, halilipatan ko rang kaugalingon ag tawgon nga amiga ka it akon nga tagtuga.

--Rabindranath Tagore. Gin-Inakeanon ni Melchor F. Cichon, Nov 28, 2015

Gitanjali 1

Gitanjali 1

Ginhimo mo ako nga owa't katapusan, ruyon ring kalipayan. Ro maagto ngara nga sueodlan hay ginabinasyo mo it uman-uman, ag uman-uman ko man nga ginapuno it bag-ong kabuhi.
Rayang maisot nga plawta it sangka pasyok hay ginalinibot mo sa mga kabukiran ag sa kapatagan, ag ginahuyupan mo it kanta nga perming bag-o.
Sa inmortal nga paghikap it mga paead mo, masadyang nadudueaan it katapusan ro maisot ko nga tagipusuon ag nagabunga it indi matawaran nga pahayag.

Maisot man lang rang paead nga magbaton sa owa't katapusan mo nga regalo. Nagtaliwan ro mga dinag-on, ag sige ka man gihapon sa pagpuno apang may habilin pa gihapon nga lugar nga dapat sudlan.
--Rabindranath Tagore. Gin-Inakeanon ni Melcichon, Nov. 28, 2015

Gitanjali 5

Gitanjali 5
Rabindranath Tagore
Gin-Inakeanon ni Melchor F. Cichon
Nov 30, 2015

Nagpangabay ako it sangka minuto ag pangkaugalingon nga kalipayan nga maglingkod sa binit mo. Pagkatapus, himuon ko rang mga ginabuytan nga mga ueobrahon.

Kon maeayo sa panueokon ko ring uyahon, indi maglinong rang tagipusuon ag rang ueobrahon hay owa't katapusan nga kalisdanan sa sangka dagat nga owa't pangpang nga pagbakho.

Gaduaw makaron ro tigsililak sa bintana ko kaibahan ro mga hutik ag pagpanghakoy; ag ginaobra  it mga tambubuyog ro andang pagkamanogbinaeaybay sa pabilyon it mabueakeakon nga taeamnan.

Oras ra agod maglingkod it mahipos, sa atubang mo, ag agod kantahan ro pangabuhi sa malinong ag nagapangeapaw nga kasadyahan.