Gaeatay sa Botong nga Tulay ag Iba pang Haiku

gaeatay sa botong nga tulay--
gakapyot ro ungang eaki
sa butkon ku anang tatay
---March 8, 2008

***
masilak--
pumilit sa tuod
ro sinipa nga eutay

***

rang apo ag ako--
nagabisa kay lolo
nagabisa kay lola

***
Adlaw it Kahilwayan--
sige ro paglekyur
ni Mommy kay Daddy

***
Bagyo Frank--
ro may kotse ag ro nakatsinelas
naga-ubog sa tubi-baha

***
gulping baha--
nagakaeunot nga tuod
ku maeaeagku nga kakahuyan

***
ro bituon
sa imong alima
nagatuytoy kakon Kana
---July 20, 2008

***
Christmas Star--
panglimang bitay eon ni Nanay
sa pwertahan
--November 15, 2007

***
amat-amat
nagamartsa ro mga mangunguma it Sumilao
gakilo-kilo ro paroe

---December 15, 2007

***
kaki nga eanas--
eumagpak ro
bolador
---March 15, 2008

***
Biernes Santo--
ginapaaguniyas ni Sean Marie
ra Lolo
---March 23, 2008

***
Bag-ong hampang sa aton--
taugan
it kamatuuran
---Abril 17, 2008

***
masilak nga hapon--
gakinanta ro titit
maski tigbaw eang ro gapamati
---Abril 27, 2008