Ahay

Ahay
Melchor F. Cichon
March 15, 2017
Ahay,
Nabasa ro mahaea ag haboe
Ku sangka homeless nga baye
Nga ginbilin na
Sa kilid it Sandpiper.
Gulpi abing bumunok ro uean
Ag owa eagi-eagi nana mabalikan
Ro sidewalk nga anang ginaeugban.
Igto pa abi imaw galingkod
Sa pihak nga bangketa gapakalimos.
Galing owa haeos it may nagapaeapit kana
Ay ra eambong,
Pareho ka mahaea ag haboe
Hay pareho eon ka uyahon
Nga ginapilitan it tapu-tapu ag grasa.