Aswang!

 

Aswang!

ni Melchor F. Cichon 

June 14, 2013

Habatian ko man lang ra sa magueang ko.

Hatabu kuno ra sa Sta. Cruz, Lezo, owa eang ako kasayod kon kan-o ra.

Pero raya ro estorya.

Si Nay Diday hay gaeaha it puto. Ag kon mag-eaha imaw hay mga alas dos it kaagahon.

Ag siyempre kon mag-eaha ka it puto hay gapainit ka gid it tubi kon siin ro puto nga sa sueod it lata hay ginapaasuhan sa gabukae nga tubi.

Samtang gaeaha imaw it puto hay may nabatian imaw nga tunog it ginaeapakan nga liay it niyog. Ro andang baeay hay may pinsa ag ginasarhan ra kon gabii. Pero nga kahangawa si Nay Diday kon ham-at may nagaeapak ku andang liay sa andang uto. Maraya pa eang nga oras nga habatian nana ro pagkaeas ku mga liay sa andang idaeom it baeay. Sa kahadlok nana nga may aswang sa andang uto, hinakwat ni Nay Diday ro lata nga ginaeahaan nana it puto ag gulping binubo ra sa may nagakaeas-kaeas nga lugar. Anang habatian nga may nagdaeagan. Ag gulping naghipos.

Nagpadayon si Nay Diday sa pag-eaha it puto.

Pagkaagahon nag-eapta ro balita nga si Lola Usyang (bukon it anang matuod nga ngaean) nga ginakuno-kuno nga aswang hay napasu halin sa ueo hasta sa anang eawas.

Bangod pobre, owa gindaea ku anang mga kaigbataan ag mga kaeapit si Lola Usyang sa ospital.

Pagkalipas it mga daywang dominggo hay namatay si Lola Usyang bangod sa mga pasu nga naaguman na.