Hin-uno Pa Baea Ra Matabo?
Ni Melchor F. Cichon
February 9, 2020
Sa America ro mga puti
Ag ro mga itum
Makadungan eon sanda kon magkaon,
Sa hotel man o sa restauran;
Kon magsakay sanda sa elevator,
Kon magkasakay sanda sa bus,
Sa train o sa eroplano nga owa't segregasyon.
Pwede eon man sanda makaeskuyla
Maski siin eang nga eskuylahan nga nagustuhan nanda.
Pero sa Panay
Ginatabog si Ambong Ati
Bag-o pa man imaw makasueod sa mga malls,
Ginapahadluk sa mga unga nga indi magkatueog.
Ginasinunlog ro mga unga nga Ati sa eskuylahan
Hasta indi eon lang sanda magtuon.
Hin-uno pa baea sanda tanan makakaon
Sa mga fastfoods
Ag makasueod sa mga malls
Nga owa eo't kuskos balungos?
Hin-uno pa baea sanda matawag nga Pilipino?
Nga tawo?
No comments:
Post a Comment