Sige Eang, Paayawi!
Ni Maeara
June 26, 2021
Tanan nga pispis gahuni
Hasta magpaeaeos ro andang limog
O hasta maubusan it hangin ro andang mga baga.
Ro busay owa’t pahuway ra pagtinubod
Maski owa’t may gasag-ob
O owa’t eanas nga gahigop
Agod ro paeay, mais o baeatong makapabug-at it buesa
Ni Tatay ag ni Nanay.
Ro adlaw owa’t pahuway sa anang pagsinilak
Maski may galipod pa nga gae-um
Katuead sa pagsiniga ku mga bituon ag ku buean
Maski sige ro paghinapay-hapay ku niyog bangod sa bagyyo.
Pareho king pagdinuyan ku atong eabsag
Hasta ra makatueog.
Ag kon tueog eon
Owa man gihapon ro untat king pagpalibog
Kon ano ro ieamhay sa tinuea mo nga tangkong.
Samtang ring Beloved hay sige man ra anang
Pag-inung-ong it Tanduay
Sa binit it karsada kaibahan ka anang mga barkada.
Pero sige eang
Mauntat gid ron
Kon dueaw eon ra kalimutaw;
Kon indi eon imaw kadaea
Ku baso nga andang ginapalibot-libot
Hasta imaw magdupas-dupas
Sa anang pag-uli sa inyong baeay
No comments:
Post a Comment