Sabado

Permi ko gid nga ginahandum ro adlaw nga Sabado.
Ruyon abi ro adlaw kon siin ako makabugtaw it mas mabuhay ay owa't obra sa opisina.
Ruyon man abi ro adlaw kon siin ako pwede makasueat it mabuhay-buhay sa amon nga kompyuter.
Ugaling ku nakataliwan nga buean hay ginhimo nga limang adlaw ro amon nga bakasyon sa opisina ay mga pista opisyal. Ku Agosto 25 hay kaadlawan it Siyudad it Iloilo, busa owa it trabaho. Owa man ako magtan-aw ku marcha ku mga empleyado it siyudad it Iloilo. Sa pribado nga katatapan abi ako gaobra. Huwebes rato. Bangod nabutang sa tunga ro Biyernes sa pista opisyal ag sa Sabado hay ginhambaean kami nga indi eon lang kami magsueod ku Biyernes ngato. Busa halin ku Huwes, Biyernes, Sabado, Dominggo, owa kami it obra. Pag-abot it Lunes, petsa 30 it Agosto hay owa eon man it obra ay National Heroes Day, busa pista opisyal eon man. Ag pagkasunod nga adlaw , Agosto 31 hay katapusan ku Ramadan it mga Muslim, busa owa eon man it trabaho. Abaw kahaba nga bakasyon nga may suweldo!

Ugaling hay ginbayran namon ratong Biyernes ku Sabado, Septembre 10.
Busa imbes nga magpahuway-hueay ako sa baeay, ag magsueat kon ano gid man rang gustong isueat hay indi ko maobra sa baeay ay igto ako sa opisina.

Natamad ako mag-obra kato. Owa man it istudyante nga nag-ago sa Library kon siin ako gaopisina. Owa man it empleyado nga nagsueod sa Library. Ako gid lang nga isaea kato.

Masubo--owa ako't kahambae.

Mayad eang ay may kompyuter ag may internet may naobra ako.

Mayod man ay may transistor radyo ako kon siin ako nakapamati it musika ag drama.

Kon owa, kaina pa ako nag-uli.

Kon indi ako magsueod, haeos sangka libo man ro mabawas sa suweldo ko.

Sige eon lang ngani. Madali eon lang man ro alas singko.