Hasayran Ko Nga Indi Makaeubag Rang Mga Binaeaybay

Hasayran Ko Nga Indi Makaeubag Rang Mga Binaeaybay
Ni Melchor F. Cichon
June 25, 2017
Revised: June 28, 2017


Hasayran ko nga indi makaeubag rang mga binaeaybay
Sa mga tiku nga mga piniino
O ro mga tag-ana kara.
Hasayran ko nga indi makaeubag rang mga binaeaybay
Sa mga tiku nga mga daean
O ro mga utok ag ro mga alima nga nag-obra kara.

O ro mga tadlong nga mga daean

Pero eutayon o taputapuhon.

Hasayran ko nga indi makaeubag rang mga binaeaybay
Sa mga nagakaeahueog nga bomba,
Sa mga bala nga nakautod it mga kabuhi
Nga owa't eabot sa mga nagakaeabunggo nga pagpati.
O sa mga tawo nga may mga mataeum nga dila.
Pero basi eang makatiurok rang mga binaeaybay
Sa mga kasingkasing it mga tawo
Agod matadlong nanda ro andang kabobut-on.