Pabula, Ro Adlaw nga Nahueog Ro Eangit

Ro Adlaw nga Nahueog Ro Eangit

Ginsueat it uman ni Melchor F. Cichon, RL

Sept. 25, 2017

Si Pilantok, nga usa, hay nagaeukso-eukso sa daean it kagueangan.

Ag gulpi nga may napan-uhan imaw. Ro mga hilamon hay nagkaeabali bangud hatampukan it mga daeagku nga pako ag mga badyang. Sigurado gid imaw nga hinimuan ra it mga pangayaw, ag bukon it mga tagagagueangan.

Nagpadayon si Pilantok sa anang pagliksiliksi. Nagapabugae imaw nga owa gid imaw hadakpan sa siud.

Apang ro mga maabtik nga tawo hay naghimo it eagpit nga maski ro tuso nga usa hay mapataeang. Busa samtang gasaut-saut imaw sa daean hay nahueog imaw sa maeapad ag madaeum nga buho. Pag-eaum nana hay napudpud ro saeug it kagueangan ag nahueog imaw.

Pagkabangon nana hay gintan-aw nana ra palibot, ag hakita nana nga una imaw sa maeapad ag madaeum nga buho. Ag anang hapiniino nga sigurado imaw nga madakpan nga buhi.

Owa magbuhay ha may habatian imaw nga limog. May hadumduman imaw.

“Tabang! Tabang! Euwason ninyo ro inyong gaugalingon!” mabaskog nga singgit ni Pilantok.

Ro amo, ro kalaw, ag maski ro lewon sa bukid hay naglingling sa binit it buho ag nagtan-aw sa idaeum.

“Dali!” singgit it uman ni Pilantok.

“Ano ro problema, Pilantok? pangutana ku lewon.

“Gapangabay ako kinyo nga kon gusto pa ninyo nga mabuhi hay dalia ninyo,” ro engganyo ni Pilantok.

“Kon may buot pa kamo hay eumompat eon kamo sa buho ngara. Owa baea ninyo mabatii nga makarayang adlaw hay mahueog ro eangit?” hambae ni Pilantok.

Pagkabati nanda kara ag bangud hasayran nanda nga maaeamon si Pilantok hay ro tatlo ngato nga mga sapat hay dali-dali nga eumompat sa buho.

Owa magbuhay hay naengganyo man ni Pilantok ro anwang, ro baka, ro kabayo pati ngani ro mga baboy taeunon hay eumompat man sa buho.

Tag igto eon tanan ro mga kasapatan sa sueod it buho nga nagasugilanon hay nag-umpisa it pagliniksiliksi si Pilantok sa likod it mga daeagko nga kasapatan hasta imaw nakaeampuwas sa buho.

Tag igto eon si Pilantok sa guwa it siud hay naghibayag ag nagsinaut-saut imaw sa binit it buho samtang gatan-aw-tan-aw kana ro mga kasapatan sa idaeum it buho.