Mga Luwa ni Tay Itsong

MGA LUWA ni Tay Itsong

By

Melchor F. Cichon

Updated: January 2, 2014

Updated: July 3, 2015

updated: Sep. 23, 2022

updated: April  23, 2024

Luwa 1

Si Eugene gatungtong sa bato.

Kon hapiton it bagyo

Nagahukas-hukas ra ueo.

Luwa 2

Pagtueok ko sa eawod

Ro El Nino nagakurog.

Paglingot ko sa Guicod,

Ro mga niyog nagatiyogtiyog.

Luwa 3

Nagtuea ako't eangka

Gin-eamhayan ko't bae-a.

Ro habilin pagkaeaha

Sangkakutsarang duga.

Luwa 4

Kon magkiringkiring si Vanessa

Sa ibabaw it lamesa,

Ro ay Nonoy nga pangatlong mata

Nagarambol, nagakudeta.

Luwa 5

Hipos anay, hipos anay

Ay ro mga kandidata nagamartsa.

Andang besti nagasidlak, nagasiga

Bangud ro andang anwang ginpanumba.

Luwa 6

Kon sa baboy ag sa anwang

Ro pinakapresko nga paligusan

Bukot suok, bukot suba

Kundi eogan-eogan.

Luwa 7

Sa atop it eangit

May antulihaw nga nagsinggit:

May ayam nga gapang-it

It asawa nga natuslok it siit.

Luwa 8

Nagabueak, nagabueak

Ro mga jeepney sa highway.

Kon magtumbling eon ron ngani

Ro Milo ag ro kape nagalibre.

Luwa 9

Ro itlog sa Bataan

Gahabok ra dughan.

Kon rayang itlog bumuswang

Magaligid gid kita tanan.

Luwa 10

Sa tingoy-tingoy it santoe

May antiyamis nga nagapangihoe:

Pag-agi ni Lolo Empoy

Nagrap sa anang ingkoy.

Luwa 11

Damuea gid ring oling,

Baskuga gid ring tamboe

Agud mag-abo ro hilong

Nga paeas-anon ni Sr. Sto. Niño.

Luwa 12

Nagbunit ako sa bubon

Halin sa agahon hasta sa hapon.

Pag-abot ko sa amon

May mga bae-a nga gahueat kakon.

Luwa 13

Pagtapas ko't lawaan sa Ormoc

Tanan nga mga baboy naghueagok.

Pag-agi ko sa baybay

Nagtambak ro mga bangkay.

Luwa 14

Pagsunog ko't Madia-as

Tanan nga ilahas nagwaeas.

Pag-abot ko sa baeay

May mga PC kakon nga nagabantay.

Luwa 15

May niyog nga nagtubo

Sa tangkugo it alimango.

Paghimas ko sa anang daywang bunga

May nagsinggit: Putang Ina!

Luwa 16

Kon ako magboto,

Pilion ko ro gwapo.

Kon imaw ngani maperde

Ihueog ko imaw sa Campo Berde.

Luwa 17

Sa amon nga kusina

May kawit ako nga gin sab-it.

Pagtagay ko sa bol it tuba,

Ro mga manogmama naggueowa.

Luwa 18

Igto sa amon nga baeay

May daywang bayeng paeahikay.

Pag-abot ni Nanay,

Nagmaeaea ra andang eaway.

Luwa 19

Pagsakay ko sa tri-sikad

May huya-huya nga nagbalibad.

Nagbalibad ay ra dahon

Indi eon makabuskad.

Luwa 20

Sa bubungan it eangit

May nasab-it nga anglet.

Sa akon nga pagsinungkit

May nahueog nga laon nga pusit.

Luwa 21

Si Inday owa gid it kaeo-oy

Kay Nonoy sa Kuwait nagapainit.

Kon imaw ngani eamigon

Masuhot sa haboe ni Ambeth.

Luwa 22

Sa amon nga barangay

Kadasig magtubo ro paeay.

Nagasabud paeang si Tatay.

Nagapadaeawat eo't bugas si Nanay.

Luwa 23

Sa Barangay Guicod

May bomba't tubi nga gin ugdok.

Tanan ro nagasag-ob gapila kon mag-abot,

Owa't eabot kay Mama Iskog.

Luwa 24

Sa amon nga opisina

Daywang klase ro gapila:

Ro isaea, kada kinsina;

Ro pangaywa, kinse-trienta.

Luwa 25

Sa amon nga banwa

May sanglibu nga daeaga.

Ugaling abo gid rang kangawa

Ay kon gabii eang sanda kon mag-obra.

Luwa 26

Kon ako mangasawa,

Pilion ko gid ro gwapa

Para kon maubusan eon ngani ako't kwarta

Sa Japan ko imaw ipasalta.

Luwa 27

Sa sueod it Madia-as

Gatumpok ro tadyaw:

May sa lolo, may sa eabsag,

May baroto sa ibabaw.

Luwa 28

Sa amon nga banwa

May doktor nga paris kay Richard Gomez.

Kon imaw magbueong

Ro mga daeaga nagakalipong.

Luwa 29

Sa barangay Botong

Basket-basket ro uhong.

Pero kon ro mga daeaga ro papilion.

Ro mga sukoe gid ro andang gabuton.

Luwa 30

May hepe sa opisina namon

Sa overtime daeayawon.

Pero kon ra suweldo ro pagahambaeon

Mas mapuea pa ro uhong.

Luwa 31

Ro baeay ko sa Boracay

Ra poste ginhimo sa sigay.

Kon sumaka si Inday

Nagakapusa ra tuway.

Luwa 32

Sa tiyan it dragon

Ro mga Pinay mahipuson.

Owa gasinggit maskin kuroton

Ay ra andang tiyan gutom.

Luwa 33

Sa ibabaw it santoe

May sueat ako nga ginduhoe.

Ginbasa ni Dumpoe:

Lezo Elementary School.

Luwa 34

Igto sa Takas

May daeaga nga haras-haras.

Kon magkatoe ra anang eawas

Ginanusnos na sa baeas.

Luwa 35

Sa baryo it Silakat-Nunok,

May payag nga mabilog-bilog.

May daeaga nga bilambilog

May soltero nga andang ginapatiyog-tiyog.

Luwa 36

Inday, maski siin ka magtago.

Maski sa alibutod it nonok.

Tigban ko, barinahan ko.

Gugma ro nagasugo.

Luwa 37

SA ibabaw it niyog

May sueat nga nagaeabaw.

Binasa it antulihaw:

Ro anwang kuno hay owa't ngipon sa ibabaw.

Luwa 38

Sa amon nga ugsaran,

May bato nga ginbutang.

Kon sin-o nga soltero kara ro makasandad,

Sigurado gid nga magbisa kay Tatay.

Luwa 39

Igto sa Lezo

May pantat sanda nga gin-ihaw.

Pagguwa ni Tay Itsong

Tanan nga tawo nag-sing-along.

Luwa 40

Si Tatay sobra gid kahipos

Maski hilong mahipos man gihapon

Peru kon imaw maghueaguk

Gakaeabugtaw tanan ro mga nagakaeatueog.

Luwa 41

Tan-awa ro bombilya

Nagadueom, nagasiga.

Paris man it paghigugma,

May puno, may punta.

Luwa 42

Nagsueat ako't luwa.

Ginditso ra ni Lola.

Pagkabati kara ni Tay Itsong,

Nagpropos imaw kay Lola dayon.

Luwa 43

Sa pihak it liptong

May eaki nga nagakungkung

Ginhangeab imaw it anwang

Anang pageaum hay bawang.

Luwa 44

Paghalin ko sa baeay

Nagbilin kakun si Tatay,

Kon ako kuno mangasawa

Pilion ko gid kuno ro daeaga.

Luwa 45

Paghalin ko sa baeay

Nagbilin gid sa Nanay,

Bangod kuno ako maeaw-ay

Magpabinit-binit eang ako anay.

Luwa 46

Sa likod ku among baeay

May naeuto nga bayawas;

Kon may baye kara nga makasungkit,

Ipakasae ko gid kay Ambeth.

Luwa 47

Sa likod ku among baeay,

May nagtubo nga bayawas;

Kun sin-o kara ro magtapas

Ipakasae ko gid sa Takas.

Luwa 48

Ro gugma mo Nonoy

Akon nga batunon

Pagkatapos mo huyapon

Ro mga baeas sa baybayon.

Luwa 49

Pag-abot ko sa baeay

Nagarapike ro baba ni Tatay ag ni Nanay;

Nagsueod ako sa tadyaw,

Owa eon gid nanda ako mapukaw.

Luwa 50

Sa ibabaw it Manduyog,

May tumugpa nga banog;

Akon kunta imaw nga dakpon,

Ugaling gintuka rang uyahon.

Luwa 51

Inday kon batunon mo eang ako,

Indi mo gid pag-angkiton ring siko;

Kon mag-usoy ka't makabitan,

Mausoy man ako ku akong masab-itan.

Luwa 52

Sa amon nga baryo

May lola nga matambok;

Kon binukbok indi makakadlot,

Pero kon sinanlag nga mais, nagaeagumok.

Luwa 53

Sa amon nga ugsaran,

May nagtubo nga melon;

Bukon ma't imo, bukon ma't akon,

Peru hipos eang ay aton nga kan-on.

Luwa 54

Sa kilid ku among baeay

May nagtubo nga kutikot;

Kon imo ngani ra nga usapon,

Matueo-tueo gid ring sip-on.

Luwa 55

Sa amon nga dingding,

Nagbueak ro everlasting;

Kon sin-o kara ro makalingling,

Magaeoksu-eokso gid ra kasingkasing.

Luwa 56

Sa ibabaw it Bukid Manduyog,

May pesos nga nagarol;

Nagaligid, nagarol.

Dumiritso sa Daily Double.

Luwa 57

Sa amon nga ugsaran,

May ginbutang nga bato nga maeapad;

Kon sin-o kara ro makasandad,

Indi gid kay Inday makabalibad.

Luwa 58

Sa Bacolod ag sa Iloilo, ro kwarta ginapiko,

Sa Antique ro kwarta sa kaeanasan gina-arado;

Sa Aklan, ro kwarta gauean

Sa karsada, sa kaeanasan.

Luwa 59

Paeayo, paeayo,

Baye nga paeasab-it;

Kon gusto mo mabaton it pumueoyo,

Magpasermon ka anay sa simbaha't Kalibo.

Luwa 60

Sa adlaw-adlaw ko nga pageaya

Sa tunga-tunga it Akean;

Indi gid ako makadakop it bae-a

Rang eaya gali owa it tengga.

Luwa 61

Pito nga bukid rang gin-eakbay.

Leon ag tigre rang kaaway.

Ro kagaoy akon ginsikway

Agod makahambae eang ako kimo it Inday.

Luwa 62

Kon ikaw mangasawa

Pilion mo ro bayeng maeaw-ay;

Indi ka gid mageaway-eaway

Ag ring dila mahimo gid nga gaway-gaway.

Luwa 63

Masadya tan-awon ro pantalya,

Nagadueom, nagasiga

Paris it paghigugma it hari at prinsisa

Sa Francia man o sa Alemanya.

Luwa 64

Sa amon nga opisina

May baeo nga senyora

Adlaw-adlaw imaw nagabongga

Peru kon kinsina, ro gasukot kana gapila.

Luwa 65

Sa amon opisina

May ulay nga daeaga;

Kon oras it trabaho

Sa bubungan gatapik ra painu-ino.

Luwa 66

Inday, magpaeapit ka riya,

Kon indi ka eani matumba

Sa ginasakyan mo nga bala,

Pakaslan gid dayon kita.

Luwa 67

Si Edad nagpanamgo

Sa boyfriend nana nga Amerikano;

Pero pagkasayod nga abo ra kuto

Nagbag-id eon lang imaw ka siko.

Luwa 68

Sa primero nga pagkakita ko kimo

Rang tagipusuon nag-euksoeukso;

Pagkakita ko kimo nga owa't make-up

Gulpi ako nga nadismayo.

Luwa 69

May pispis ako nga antiyamis

Pagbutang ko kana sa hawla nga saesaeon,

Nagsinggit imaw kakon:

Sumueod ka man riya kakon.

Luwa 70

Sa tanan namon nga magmaeanghod

Ako gid ro pinakamaisog;

Kon mag-abot ro kasisidmon

Sa saya ni Nanay gakupkop ako dayon.

Luwa 71

Ngisi ag ngisi

Si Eaon sa library;

Gali may habunit nga eaki

Sa paggamit it internet.

Luwa 72

Si Inday, Si Nanay

Permi eang sa anang nobyo naga-away;

Nanago ako sa tadyaw,

Ginhakwat ako kang bayaw.

Luwa 73

Nagtanum ako't katumbae

Sa binit ko amon nga tangkae;

Nagbunga it kutikot,

Ro makakaon kara nagabuktot.

Luwa 74

Kon gusto mo gid man ako

Nga mangin nobya mo;

Ro adlaw imo nga tukuran

Agud indi kita madueman.

Luwa 75

Sa baeay it eamang,

May tagasaw nga nagakabit-kabit;

Umagi si Ambeth,

May iti nga pumuswit.

Luwa 76

Kon gusto mo gid man ako

Nga mangin nobya mo;

Basyahan mo't yelo ro adlaw,

Agod indi ra matunaw.

Luwa 77

Maskin matunaw sa North Pole ro yelo

O maupod ro kaeayo sa impiyerno;

Owa ra it kaso, basta ikaw Inday

Iya eang kahulid ko.

Luwa 78

Balita! Balita!

May fetus nga hakita

Sa mahalimunon nga daean

Maeapit sa iskuylahan.

Luwa 79

Ro batchoyan sa Iloilo

Ginadagsaan it mga tawo;

Owa sanda't malay

Nga kutsara-kutsara nga betsin ro ginaeamhay.

Luwa 80

Patindugan mo man ako't palasyo

Ag marmol man ro ginaeugban ko:

Indi man ako gihapon kimo

Ay owa ka gid gasipilyo.

Luwa 81

Sa amon nga baryo

May baeay nga ingko palasyo;

Ugaling sa andang ugsaran,

Ro basura anda nga ginapabay-an.

Luwa 82

Ipilak, ipilak

Ro sigay sa baybay;

Ihaboy, ihaboy

Ro baye nga baboy.

Luwa 83

Saeamat, saeamat

Sa tawohan it DPWH;

Ro libre nanda nga polbos

Adlaw-adlaw ro pumoeoyo naga-antos.

Luwa 84

Sa binit it baybay

Si Joel nagpaugduk it baeay;

Kon sakaan ni Inday

Gaunat-butong it anay.

Luwa 85

Ro bilin ni Tatay

Paghalin ko sa baeay,

Kon ako ngani mangisog

Sundon ko ro kilat nga owa't daeogdog.

Luwa 86

Sa Aklan ro kwarta

Owa ginapala o kinapiko paris sa Negros;

Owa man ginakali pareho sa Iloilo

Kundi ginasilsig sa karsada't Kalibo.

Luwa 87

May pispis ako nga antulihaw,

Ginhigot ko sa tadyaw;

Pag-agi ni Tay Islaw,

Gintuslok ra kalimutaw.

Luwa 88

Matuod nga may email;

Matuod nga may cell phone;

Pero rang gusto nga sueat nga batunon

Ring hand written letter man gihapon.

Luwa 89

Sa likod it anwang

May ginbilin nga drawing;

Akon nga gintan-aw:

"Owa ka gali it ngipon sa ibabaw."

Luwa 90

Sa Kalibo,

Ro Smokey Mountain sa pangpang it Akean;

Kon umabot ro baha

May limpyong basurahan eon man.

Luwa 91

Saeamat.Saeamat.

Sa mga taga-DPWH.

Ro mga karsada pagkatapos it uean

Ro mga saeakyan nagaduyan-duyan.

Luwa 92

Ro mga senador sa Manila

Nagahabuyanan it eutay;

Ro mga army sa patag-awayan,

Nagasuksok it gision nga saewae.

Luwa 93

Igto sa suba it Sitio Gemino, Altavas

May gineubong nga puti nga linganay.

Kon sin-o ro makabatak karon,

Sigurado gid nga magmanggaranon.

Luwa 94

Igto sa amon nga barangay

Ro mga eamang nga eaki

Nagakaeamatay sa tupad ku baye

Nga nakatao kanda it kalipay.

Luwa 95

Si Francisco del Castillo

Puno sa Aklan it mga Katipunero

Namatay sa bala nga naghalin kay Moises Elecito

Nga ana man lang nga kasimanwa.

Luwa 95

Kon may hangin ring ueo

Indi ka gid mag-agto sa Kalibo;

Basi sa pag-uli mo sa inyo

Owa ka eon it ueo.

Luwa 96

Pag-agto ko sa Batan

Nakadakop ako't daeupingan;

Sosyal nga daeupingan

May lipstick ra hasang.

Luwa 97

Ro mga eaki sa Lezo

Very busy gid kon Domingo

Sa pagsininggit it lugro, lugro

Maski ro andang taeagbasan madaeum.

Luwa 98

Sa amon nga kwarto

Pagkatapos it uean

Ro eangit hahaaywan.

Luwa 99

Kon mag-agto ka sa Lezo

Owa ka gid igto hiagto

Kon sa pag-uli mo

Owa ka't baeon nga kueon ag puto.

Luwa 100

Si Angelo de la Cruz

Nag-agto sa Iraq;Sa anang pag-uli

Ro kalinungan it Pilipinas natabyog.

Luwa 101

Pag-agto ko sa Batan

Hakita ko si Datu Kalantiao--

Nagalibog ra ueo.

Ginasuspitsuhan kuno ra Kodigo.

Luwa 102

Pag-agto ko sa Batan

Ra ueo ni Datu Kalantiao nagabukae.

Ro ana kuno nga Kodigo

Owa't kamatuoran.

Luwa 103

Pagkaeunod ku Solar I

Sa baybayon it Guimaras

Namatay ro mga isda

Pero nabuhi ro mga researchers

Luwa 104

Kon Valentine's Day

Gahueap it petals si Elsa:

He loves me, he loves me not

Ham-at owa imaw riya?

Luwa 105

Pagbugtaw ko kaina

Habatian ku rang limog:

Inay, siin ka?

Ham-at gin-aywan mo ako iya?

Luwa 106

Si Lolo Itsong nagpanaw kaina,

Sa Maeara nagpaliwa-liwa;

May ana nga hakita

Daywang tambibidli nga puea.

Luwa 107

Indi ka magtangis pawikan

Kun ikaw hay amon nga madakpan;

Ring bagoe sa museum ibutang

Agod makita it sangkatawuhan.

Luwa 108

Pagkatapos it fiesta

Masadya gid ro tanan,

Owa't eabot kay Nanay

Kun paano mabayran ro utang.

Luwa 109

Ro among malunggay

Abu gid ro natabangan

Ay ro among palibot

Owa eo't problema sa andang tinuea

Luwa 110

Sa Super it Iloilo

Adlaw-adlaw ro fiesta't mga eangaw

Sa mga isda ag karne

Nga ginadisplay

Luwa 111

Paghalin ko sa baeay

Nagbilin kakon si Tatay,

Indi gid ako mag-uli

Kon owa ako't mabitbit nga monay.

Luwa 112

Sa ibabaw ku among atop,

May gakabitkabit nga kabog;

Tonto nga kabog

Gusto gid magpabilog-bilog.

Luwa 113

Mabahoe nga balita!

Nagbunga ro mansanas sa Pilipinas

Ag ro iba, sa Alaska.

Luwa 114

Mabahoe nga balita!

Si Lola naka-miniskirt eot-a,

May cellphone pa

Nga nagakabit-kabit sa hawak na!

Luwa 115

Si Lola ag si Lolo

Kada isaea kanda may camera nga cellphone.

Ro anda nga load, daywang adlaw eang ubos eon

Ay ginapasaload gali sa apong mahugod.

Luwa 116

Kada agahon

Alas tres si Nanay kon magbangon

Agod temprano pa kuno

Si Tatay magtug-on.

Luwa 117

Igto sa Kalibo

May daeaga nga matambok

Kon imaw mag-eag-ok,

Nagakaeamatay ro namok.

Luwa 118

Igto sa Barangay Bolilao,

May gintabang karne nga hilaw;

Peste nga ayam

Gintuslok na ra kalimutaw.

Luwa 119

Pagsaka ku presyo't mga baeakeon

Nagsaka man ro hemline it mga daeaga,

Pero nagpanaog ro andang neckline.

Luwa 120

Ro ukay-ukay sa Leganes

Ginadayo it mga tawo

Nga nakadyip

Ag nakakotse.

Luwa 121

Nag-agto ako sa Banga

Nakakita ako't buaya.

Grabe nga buaya

Ra dila hasta sa Buruangga.

Luwa 122

Igto sa Takas

May baeay nga mataas,

Kon imo nga itay-og

Daw paeay sa sako nga may buslot.

Luwa 123

Sa tanan nga pispis

Rang nanamian gid hay antiyamis

Kon isueod ngani sa hawla

Dayon ra singgit: "Sueod man riya!"

Luwa 124

Masayran ko gid

Kon sin-o ro sa CR

Ay ra huni ka ihi:

"I miss, I miss, I miss."

Luwa 125

Kon ako mag-asawa

Pilion ko gid ro may maeapad nga uma

Ay pagkatapos ko among kasae,

Ibaligya ko pati ro ana nga saewae.

Luwa 126

Kon gusto mo gid man ako

May pangabay eang ako kimo:

Tuhugon mo ro tungaw

Nga sangkalibu.

Luwa 127

Anay ka, anay ka

Mabueag anay ako;

Sige na, sige na

Ay puno eon ring buesa.

Luwa 128

Ah Ching! Susmaryosep.

Rang muskada naasik

Buligan ka it usoy,

Buligan ka it usap.

Luwa 129

Grabe nga balita!

Sa UP Visayas

Ro isda may dila!

Ginaeapakan pa ni Diwata.

Luwa 130

Si Ana nga taga-Guimbal

Perming may bitbit nga busae

Agod kon magkita sanda ni Neri

Indi sandang daywa makawakae.

Luwa 131

Indi gid kamo mangawa

Kon gabaliskad ro atong banwa

Ay ro tawo nga ginabutang sa pwesto

Owa't tugas, owa't ueo.

Luwa 132

Samtang gaani't paeay si Nanay

Gakanta't Dandansoy si Tatay

Sa andang eangbong gahapay

Kaatubang it tubang bag-ong tagay

Luwa 133

Aba may sigbin gali

Sa NAIA

Si Rodolfo Lozada Jr., tan-awa baea

Naduea pagpanog na sa eroplano kaina

Luwa 134

Masadya, masadya gid kita

Ay iya si Waling Waling

Ginpasaut si Kumander Posa

Nga may bitbit nga paka

Luwa 135

May eangbon ako sa Maeara

Ginprenda ko sa taga-Sagasa

Ana pa gid nga ginprenda

Kay Baby Esmerna nga taga-Estaka.

Luwa 136

Pagtunod it adlaw

Nagsakit rang tuhod

Nagsakit pa gid rang likod

Mayad ay gintaw-an mo ako't tungkod.

Luwa 137

Pag-agto ko sa Capiz

Nagkita kami ni bahong

Ginpaliksan ko imaw it sinamak

Ay abaw, gaaso-aso rang bibig sa kanamit.

Luwa 138

Igto sa Mine's View Park

Sa Siyudad it Baguio

May mga Igorot igto

Nagapahueam ku andang terno

Ugaling mabayad ka't napueong piso.

Luwa 139

Paglingkod ni Amelia

Nagpalakpak ro sawa

Bangod sige ro sueod it grasya.

Luwa 140

Pagtindog ni Amelia

Nagkaeapyot ro mga bituon

Ay umagi ro Signal Number 4.

Luwa 141

Nag-agto ako sa Kalibo

Nakakita ako it mueto

Gintuhil ko ra ueo

Nahimo nga kaeayo

Luwa 142

Pag-agi ni Bagyo Yolanda

Ro mga saging nagkaeatumba

Owa't eabot sa saging ni Oriel

Ay madaeum ra pagkaungot sa eugta ni Maria

Luwa 143

Igto sa Balete

May hakilaea ako nga daeaga

Mabahoe gid rang kahangawa

Ay kon imaw magsabat ra mata katuyok sa daywang pihak.

Luwa 144

Pag-abot ko sa Lezo

Sa Maeara ako domiretso

May bae-a ag aeugsok igto

Kakon gusto maglamano.

Luwa 145

Si Simeon Mobo Reyes,
Lolo it Aklan.
Pero ra eoeobngan,
Ginatabuan it kahilamunan.

Luwa 146

Nag-agto ako sa Iloilo.
Nangayo ako't humay.
Agoy, gintaw-an ako't paeay.
***June 18, 2015

Luwa 147

Nonoy, indi ka gid maghikay
Ku akon nga pagkaeaw-ay
Basi kon ikaw hay maeumay
Putson ta gid it eamay.
***Unknown author
***Gin-Akeanon ni Maeara, June 15, 2015

Luwa 148

Kon maeapit eon lang ro eleksyon,
Tanan nga kandidato hay mga Juan Posong;
Tanan nga satanas ag angel ginapaeapitan,
Mabuoe eang ro andang kinahangean.
***June 9, 2015

Luwa 149

Hakita mo Inday ro mga bituon?
Akon ron sanda nga kuhiton,
Basta promise imo gid ako nga higugmaon
Hasta matunod ro adlaw naton.
***June 18, 2015

Luwa 150

Kon ako mangasawa,
Pilion ko gid ro Makaton-on;
Owa't eabot nga daw Sharon Cuneta,
Mahugod pa sa kama.

*** 2005

Luwa 151

Nag-agto ako sa Buswang
Nag-agi kami sa mga bakawan;
Owa't eabot nga mahandong,
Rang piniino hay naglinong.***June 4, 2015

Luwa 152

Nagbirthday si Mel Constantino
43 eon imaw kuno
Pero kon imo imaw nga tan-awon
Pares it desiotso man gihapon
***June 5, 2015

uwa 153

Pag-agto ko sa Bakhawan Ecopark
Ro mga alimango nagpaeakpak
Ay owa eon ro eatayan nag-eagaak
Kapin pa ay maeamig ro silak.
***June 6, 2015

Luwa 154

Pag-agto ko sa Banga,
May hakita ako nga daeaga.
Kon akon imaw nga tueokon,
Indi gid ako kapiyong.
***Melcichon, June 6, 2015

Luwa 155

Hakita mo Inday ro mga bituon?
Akon ron sanda nga kuhiton,
Basta promise imo gid ako nga higugmaon
Hasta matunod ro adlaw naton.
***Maeara, June 18, 2015

Luwa 156

Kon mag-agto ka sa Boracay,
Haeungan mo gid ring tuway;
Abu rito nga kuring
Nga ra ugali hay daw matsing.
***Maeara, July 3, 2015

Luwa 157

Kon mag-agto ka sa Lezo,
Magbakae ka gid it bingka ag puto;
Ay kon indi mo ra masamitan,
Ganipis gid ring tiyan.
***Maeara, July 3, 2015

Luwa 158

Ro banwa it Lezo
Hay dapat gid tan-awon;
Owa’t eabot sa rebolto ni Rizal,
May simbahan pa sanda nga sobra eon sa sangka siglo.
***Maeara, July 3, 2015

Luwa 159

Sa Baryo Tayhawan,
May inaway it mga eanggam;
Pag-agi ni Tay Juan,
Ra ikog gaduyan-duyan.
***Maeara, July 3, 2015

 

Luwa 160

Sa Baryo Bugasungan,
Rang amiga hay haaywan;
Pagbalik ko kana pagka-aga,
Gausap-usap  imaw it inyam.
***Maeara, July 3, 2015

Luwa 161

Ro daean sa Bugasungan
May libre nga pulpos
Ag kon mag-uean
Libre man ro eutay.
***Maeara, July 3, 2015

Luwa 162

Kon mag-agto ka sa Kalibo,

Kinahangean bukon ka’t kalbo

Ay basi mapitik ring ueo.

Sa kanae gid ron maderetso.

***Maeara, July 3, 2015

Luwa 163

Ay abaw si Binay

Maski may sugo eon ro kurte

Indi man gihapon maghalin sa pwesto

Nagkaeabali eon lang ro mga bangkito.

***Maeara, July 3, 2015

Luwa 164

Ro sweldo ni Mayor

Hay owa ngani’t singkwenta ka libo,

Pero ham-at may kotse, may condo

Ag may number two?

Luwa 165

Nag-agto ako sa Plaza it Lezo
Ag nalipay gid ako
Ay ro mga halimunon igto
Hay always in bloom gid kuno.

Luwa 166

Sa baeay namon
Ro namok mas mabahoe sa anwang
Pero kon makasupsop eo’t dugo
Gaisot pareho it kuto.

Luwa 166

Si Rizal nagtungtong sa bato
Agod makita na ro pagbarlak
Ku mga nagabueoeak
Nga halimunon igto.
***Maeara, July 3, 2015

Luwa 167

May manok ako nga native
Gin-eamhayan ko't aeabihig
Pag-agi it amaeanhig
Ginhakwat na pati rang anglit
***Maeara, June 13, 2015

Luwa 168

 

Kon Ako Mangasawa

Kon ako mangasawa
Pilion ko gid ro puno ra buesa
Agod kon ako madueaan it obra
Imaw eon lang kakon ro magpaeamon hasta sa aga-aga.
***Maeara, Oct 21, 2014 

 

Luwa 169

 

Rang Euha Nagtueo

Rang euha nagtueo
Pagkasayod ko
Nga pagkaduea mo
Owa gid it nagkahidlaw kimo.
***Melchor F. Cichon, Sept. 7, 2014 

 

 Luwa 170

 

Si Ruby ag si Gabby
Nagkita sa binit it baybay;
Igto sanda nagpusa it tuway
Ag ginsupsop pati ra eaway-eaway.

Luwa 171

Nag-agto ako sa Lezo.

Ro karsada igto hay anda eon nga ginasemento.

Kabay pa nga sa masunod nga mga dinag-on

Ro karsada ngaron hay mapino, mapag-on sa gihapon.

***Melcichon

Sept. 23, 2014

 

Luwa 172

 

Samtang gaani't paeay si Nanay

Gakanta't Dandansoy si Tatay

Sa among eangbong gahapay

Kaatubang it tubang bag-ong tagay.

***Melcichon

July 27, 2014

 

Luwa 173

 

Luwa 171

 Ay abaw! Ay abaw!
700.00 eon ro kilo’t sibuyas.
Ay gali saku-sakong sibuyas
Ro nagakatueog sa bodega ni Mrs. Sibuyas.
***Tatay Itsong
April 1, 2023

  · 

Shared with Your friends

Mga Bag-o Ko nga Luwa

Ni Tay Itsong

***On-going ra

updated: April 26, 2023

Nag-agto ako sa Ubos

Agod magpueot ligbos.

Rang pagpueot owa pa matapos,

May nahueog nga ibos.

***April 30, 2023

Igto sa among eanas

May manok nga ilahas

Ginsaburan ko't baeas

Pati rang tudlo anang gin-eagas.

***April 30, 2023

Indi pa baea husto

Rang pagmahae kimo?

Ham-at gin-aywan mo ‘ko?

May ginbaton kang bag-o?

***April 26, 2023

Pagsueod ko sa library,

May libro kakon nga nag-atubang.

Ano kuno rang obrahon kana?

Hambae ko punasan kita ay makatoe ka eon kon buytan.

***April 25, 2023

Samtang gapanaw-panaw ako

Sa among poblasyon,

Nasandaran ko ro sangka talibong.

Abaw nagtindog ra ag naghambae: "Stay in attention!"

***April 25, 2023

Igto sa amon

May tikong baboy.

Ginsueod imaw sa tikong tangkae.

Ro gabahug kana hay tikong tomboy.

***April 25, 2023

May hakilaea ako nga daeaga.

Marites ro tawag kana.

Daywang kurso ra natapos:

Master in Maritesology ag Master in Marisolsology.

***April 25, 2023

Nag-agto ako sa suba

Agod magdakop it mga paka

Agod isumsuman ni Tatay

Sa tuba nga anang tinangway.

***April 25, 2023

May hasob-eang ako nga daeaga

Abaw a, gapahueoy-hueoy gid ka mata

Ugaling nasandad sa gausli nga bato.

Ahay, nagbukoe ra ueo.

***April 24, 2020

Nagpaligos ako sa banyo,

May hakita akong bao;

Gintao ko kay Lolo,

Gintungtong na sa ueo ko.

***April 24, 2023

Nag-agto ako sa opis.

Nagkaon ako't ibis.

Nag-abot si huwis,

Nagkanta imaw it lawiswis.

***April 24, 2023

Abril paeang Paskwa eon sa Kalibo.

Ro suga abi igto hay "patay-sindi" kuno.

***April 24, 2023

Kon ugsad, gamahae ro pasayan ag isda,

Pero gabarato kuno ro atay.

Ham-an baea?

Abu abi kunong silhig nga makitang gaeupad kon ugsad.

***April 24, 2023

Nonoy, bangod gusto mo gid akong ibhan sa pag-uli ko

Agod makilaea ka ni Tatay.

Pero kon madalin-as ka sa among hagdan,

Ipaangkap gid kita sa among German Shepperd.

***April 23, 2023

Nonoy, magtueok ka sa waea,

Pero kon magtueok ka sa tuo,

Siguraduhon mo nga ona ako

Agod kon maghiyumhiyum ka kakon, mahiyumhiyum man ako kimo.

***April 23, 2023

Ro gumamela maski mag-eaya,

Ra kahumot mapabilin pa gihapon,

Paris sa pagmahal ko kimo.

Buko't parehas sa pasalig mo nga naeunot pareho't eanot.

***April 23, 2023

Nonoy, abo gid nga saeamat

Sa libre mong pagpasakay kakon sa imong trisikol.

Inday, hasta sa eangit man rang pagpasaeamat kimo

Sa pagpasakay mo kakon hasta sa bituon.

***April 23, 2023.

Nonoy, hasayran ko nga outstanding ka

Imaw ron nga igto ka pirme sa guwa’t opisina

Gabantay it nagaaeaging mga daeaga

Samtang nagahueagog eon ring ueobrahon sa opisina.

***April 23, 2023

Tag buhi pa si Tatay ag si Nanay,

Owa gid ako kakita kandang nagaaway.

Kon gabukae ra dugo ni Tatay,

Ginapainum imaw it tubi nga halin sa banga ni Nanay.

***April 23, 2023

One, two bato.

Three, four bapor.

I love you before

Until the moon and the sun have lost their flavor.

***April 23, 2023

Matuod nga owa’t tugas ro kapaya

Pero kon masamitan mo ra euto nga bunga

Indi ka gid magnuoe; permi mo gid nga handumon

Ra mapuea-puea nga unod paris sa ginahandum mong huo kakon.

***April 22, 2023

Kaeain gid kuno nga olitawo

Nga kon nabalibaran eon ngani ku ginakailaan na

Sige man gihapon ra pagsinag-ob it tubi

Ag pagbinus-ak it kahoy sa baeay it daeaga.

***April 22, 2023

Sa idaeum it lamesa,

Ro mga guyom gamesa.

Indi kakita si Lolo Itsong

Ay ra mata madueom.

***April 22, 2023

Kon hiagto ka sa banwa't Lezo

Pareho eang nga owa ka kabisita igto

Kon owa ka't pasalubong nga buti ag kueon

Nga produkto it banwa namon.

***April 22, 2023

Saea, daywa, tatlo

Hakwaton eon naton ro baeay ni Lolo Itsong

Ag isaylo sa may puno it butong

Agod indi eon ra paghapayo’t kapreng perming hilong.

***April 22, 2023

Kon ikaw papilion

Anong kolor it rosas ring pueoton?

Puea, puti, berde, asul o itum?

O basi gusto mo ro dueaw nga nagatao’t kahamungayaan?

***April 22, 2023

Sa mga rosas nga hakita mo,

Sin-o gid ring hapilian?

Kon parte kakon nga ginsikway mo,

May nagahulid eon kakon sa among duyan.

***April 22, 2023

May sambulig ako nga sab-a

Nga ginregalo ko kay Maria.

Ginkinaon na hasta mag-aga-aga.

Ahay, sa ospital imaw dayon ginpurga.

***April 22, 2023

Sa ibabao it niyog

May tumogpang banog

Agod mag-inum it tuba sa saeod.

Ahay nahilong, nahueog.

***April 22, 2023

Igto sa Lezo,

Kun alas tres it Viernes Santo,

Ro mga unga gatumbo-tumbo

Agod magtaas kuno.

***April 22, 2023

Sa atop it among kamalig

May magkae nga galigid-ligid.

Kon owa ko madiparahi sa maeukong ko gid

Nga may tinueang manok tumogpa.

***April 22, 2023

Pag-agto ko sa Boracay

May nasub-eang ako nga daeagang Bukay.

Nagpangayo ako kana it tinapay,

Gintaw-an nana ako't mainit-init nga monay.

***April 21, 2023

May ginbitay ako nga monay

Sa kilid ku among baeay;

Pag-agi ni Lola Bilay,

Ginkuhit na ku anang eaway.

***April 21, 2023

May sangka eake nga haras-haras

Nga nag-eugad sa among baeas;

Mayad eang ay ro mga nag-aeagi

Hay mga meron nga may ikog it pagi.

***April 21, 2023

Ro mga bituon sa eangit,

May nagakilo-kilo, may nagakurapkurap;

Pareho man sa eugta

May nagadayaw, may nagaeaguta.

***April 21, 2023

Ro mga mata mo Inday hay daw ugsad nga buean.

Kun magtueok, may daea nga duyan;

Matueok sa waea, matueok sa tuo,

May pagtueok nga ginaduyog ako.

***April 21, 2023

Kon ako mangasawa

Pilion ko ro taga-Ibajay.

Bangod owa sanda kapanghayhay,

Pirming malipay ro sueod it pamimaeay.

***April 21, 2023

Kon ro jeepney driver hay a sweet lover

Ag ro pulis hay a never ending lover

Ag ro seaman hay your forever man,

Ano ro tawag sa piloto, a forever transferee man?

***April 21, 2023

Kon madumduman ko ro banwang Banga,

Madumduman ko man ro nagbastid kakon nga maambong nga daeaga.

Ay gali rang mga sueat kana ginabuesa ku naga-obra

Sa post office ku andang banwa.

***April 21, 2023

Indi eon pagpatueoa ring euha

Kon nagsab-it imaw sa ibang daeaga;

Maghibayag ka eon lang ay ra anang sinayluhan

Hay nasab-it sa banabana.

***April 21, 2023

 

 

******

About the Book

Halin kato hasta makaron, gusto gid ni Melchor F. Cichon nga ra anang mga binaeaybay hay  pang collector’s item, kapin pa gid kon ginabantala ra sa libro.  Bangud kara, ginpili gid nana ro mga tinaga nga ginagamit agod may  mabilin sa paminsaron ku anang mga bumaeasa. Ag raya man ro panguna nana nga rason kon ham-at sa koleksyon ngara hay ginpili gid nana ro mga binaeaybay nga sa panan-aw na hay mapabilin ag maipabugae ku anang pamilya ag ku anang kasimanwa. Isaea pa gid nga rason hay gusto gid ni Melchor F. Cichon nga ro Literatura it Akean hay mabutang sa literatura it Pilipinas.

Ro mga binaeaybay sa koleksyon ngara hay nagapukos sa tatlo ka tema: sosyal, palibot ag relihiyon. Haeos tanan nga binaeaybay sa koleksiyon ngara hay nagdaug sa mga kaeain-eain nga lokal ag nasyonal nga mga paindis-indis. Ro iba kara hay nabutang eon sa antolohiya katuead ku Patubas, Sa Atong Dila, ag sa Sansiglong Mahigit ng Makabagong Tula sa Filipinas.