KON PAANO RO IMONG SAPSAP, MAW MAN
RING LIMPAK
Ro sapsap nga ginatawag hay ro agi ku
imong pag-eabo. Kon mataeum ring ginagamit nga sanduko o wasay ag kon ano kataeom
ag kabaskug ro imong pag-eabo hay imaw ron kadaeom ag kabahoe nga parte it
kahoy o saging ro maputoe. Raya nga
parte it tanum nga nautod hay limpak kon tawgon.
Kon ikumparar naton ra sa paghambae
sa tawo hay haeos pareho man ra dueot sa piniino it tawo. Maski ano kataeum o
kadangae ro imong inughambae sa imong kahambae kon mahinay, madahan, malimanay
ring pagmitlang sa tawong indi mo nailaan o naakigan, bukon it madaeum ro dueot
sa tagipusuon it tawo, apang kon ring paghambae hay may daea nga kaakig ag
mataas pa ro tunog, maski ano ka haboe ring dila hay madueot gid. Indi eang
magdueot pero matiurok gid sa
tunga-tunga it anang tagipusuon.
Pwede man naton ra makumparar sa aton nga pagtuon. Kon sige ro padayon ro atong pagtinuon maski ano kadangae ro atong utok, magataeum gid ron. Hambae pa ngani nanda owa’t sanduko nga dangae kon sige ro pagbinaid kara. Imaw man ro sa atong kaaeam. Sa sige nga pagtinuon, indi gid magbuhay hay mag-aeam ka gid. Ag kon maaeam eon ro tawo, ra ginahambae hay madali maintindihan it tawo ag kon mapuslanon ro imong ihambae hay madali gid ra maintindihan it mga tawo ag mapabilin gid ra sa andang panghunahuna. Makita naton ra sa mga lideres naton, tanan ron sanda hay owa it untat nga pagtinuon. Busa kon maghambae sanda hay nagadueot gid sa atong piniino. Pares kay Dr. Jose Rizal, owa imaw mag-aeam kon owa imaw magtinuon—kon baga owa’t untat imaw sa pagbinaid ku anang utok. Busa ano ro natado? Ginabasa, ginatun-an ro anang mga sinueatan ag abo nga mga unga ro nadutlan ku anang mga sinueatan.
No comments:
Post a Comment