Ro Atong Puno’t Mansanas
Ginsaylo sa Akeanon ni Melchor F. Cichon from English.
December 28, 2020
Kato anay, may mabahoe nga puno’t mansanas. Adlaw-adlaw, may unga nga eaeaki nga gustong-gusto gid mag-agto-agto igto agod maghampang. Masaka imaw sa kaibabawan it puno, makaon it mansanas, ag magtueog-tueog sa anang handong. Mahae nana ro kahoy ag ro kahoy hay gusto man maghampang kana. Nagtaliwan ro mga dinag-on ag ro unga nga eaki hay nagbahoe eon ag owa eon imaw gahampang sa palibot it kahoy gada adlaw.
Sangka adlaw, ro ungang eaki hay masubo nga nagbalik sa kahoy.
“Dali mahampang kita”, kumbida ku kahoy sa ungang eaki.
“Bukon eon ako’t unga, owa eon ako gahampang sa palibot it mga kahoy,” sabat ku eaki.
“Gusto ko hampangan. Ugaling owa ako’t kwarta nga inugbakae.”
“Pasensya, pero owa man ako’t kwarta, apang pwede mong maipo rang mga mansanas ag ibaligya mo ra agod may imong kwarta.”
Nasadyahan ro unga. Ginpanghabnit na tanan ro prutas it kahoy ag pumanaw nga masadya. Owa eon magbalik-balik ro eaki pagkatapos nana maipo ro tanan nga mansanas. Nasubuan ro kahoy.
Sang adlaw, ro unga hay meron eon, hay nagbalik sa kahoy. Nalipay ro kahoy.
“Dali, mahampang kita,” kangay ku kahoy.
“Owa eon ako’t oras maghampang. Kinahangean ko mag-obra para sa pamilya ko. Kinahangean ko’t baeay agod may maestaran kami. Pwede mo ako mabuligan?”
“Pasensya, pero owa ako’t baeay. Apang pwede mong putueon rang mga sanga agod makaobra ka’t baeay mo.” Busa ginpangputoe ku eaki tanan ro sanga ku kahoy ag malipayon nga naghalin. Nalipay ro kahoy nga makita nana ro eaki nga masadya, apang owa eon magbalik-balik ro eaki kana halin kato. Nasubuan eon man ro kahoy.
Sangka tigsililak, nagbalik ro eaki ag nasadyan ro kahoy.
“Dali! Mahampang kita!” hambae ku kahoy.
“Gatigueang eon ako. Gusto ko mag-eayag agod magpahuway-huway. Pwede mo ako mataw-an it baroto?” hambae ku eaki.
“Gamiton mo rang puno agod makahimo ka’t baroto.”
Naglinayag-layag imaw ag owa eon gid magbalik-balik sa maeawig nga panahon.
Sa katapusan, nagbalik ro eaki pagtaliwan it maeawig nga mga dinag-on. “Pasensya gid palangga. Owa eon gid ako’t matao kimo. Ubos eon matao kimo rang mansanas,” hambae ku kahoy.
“Owa’t problema ah, owa eon man ako’t ngipon nga ieangkab,” sabat ku eaki.
“Owa eon man ako’t puno nga masakaan mo,” hambae ku kahoy.
“Magueang eon ako para karon,” sabat ku eaki.
“Owa eon gid ako’t matao kimo makaron. Ro habilin eon lang hay rang himaeatyon nga mga gamut,” hambae ku nagaeuha-euha nga kahoy.
“Owa eon gid ako’t kinahang-eanon makaron, kundi sangka lugar nga mapahuway-huwayan. Gaoy eon gid ako pagkataliwan it maeawig nga dinag-on,” sabat ku eaki.
“Mayad! Gamot it magueang nga kahoy ro pinakamayad nga lugar nga paeahuwayan. Dali lingkod sa euyo ko ag magpahuway.”
Naglingkod ro eaki ag nalipay ro kahoy nga nagahiyum-hiyum samtang nagatueo-tueo ra euha.
No comments:
Post a Comment