Sa Mga Tamad Eang Kuno ro Pagsueat it Binaeaybay
Melchor F. Cichon
Dec. 19, 2021
Sa mga tamad eang kuno
Ro pagsueat it binaeaybay,
Busa gasueat eon lang sanda it sugilanon.
Gahapdos gid man matuod ring paead
Sa pagpinuga king utok
Kapin pa gid
Kon maea ra.
Pero kon tinumpok eon ring habasa
Nga mga libro, editoryal;
Kon gapinamati ka't mga sermon
Sa simbahan man o sa inyong baeay;
O kon magpamati ka't tsismis sa barber shops
O sa mga bus o jeepney nga ginasakyan mo;
Kon magbasa ka o magpamati ka
Sa mga paagi kon paano magsueat it binaeaybay
Ag magsinueat ka kara
Maski sambilog eang sa kada buean,
Sa ulihi may masueat ka gid
Nga pwede mong ipaeapit
Sa Katapusan Kong Pagpaadyos ni Dr. Jose Rizal.
No comments:
Post a Comment